Adamzat degen aýyldan bolǵandardyń bári áýeli Alladan soń, ata-anany aıtady. Barlyq elde solaı, bizdiń qazaqta ekibastan. «Aıtar bolsań, Allany aıt» dep tebirengen Buqardyń ózi «Onynshy tilek tileńiz: On aı seni kótergen, omyrtqasy úzilgen, aıazdy kúnde aınalǵan, bultty kúnde tolǵanǵan, tar qursaǵyn keńitken, tas emshegin jibitken, anań bir ańyrap qalmasqa» depti.
Osy bir uly sózdi temirqazyq tutqan «Qazaq gazetteri» JShS ujymy keshe áıelder men qyz-kelinshekterdi kásibı merekesimen quttyqtap, syı-sııapat jasap, shaǵyn merekelik konsert uıymdastyrdy.
Áıelderdiń halyqaralyq merekesi qarsańynda kez kelgen qyz-kelinshekke mańaıyndaǵy jaqyn-jýyǵy, týmalastarynyń nıeti óz aldyna, ujymdaǵylardyń yqylasy bir bólek. «Kóńil kóńilden sý ishedi» demeı me? Sondyqtan da bolar mundaǵy merekelik dastarqan jaı emes, rýhanı áńgimege baı dastarqan boldy. «Qazaq gazetteri» JShS bas dırektorynyń mindetin atqarýshy Vladımır Kýrıatov pen bas dırektordyń orynbasary Qambar Ahmettiń quttyqtaý sózinen soń óleń men jyrdyń kóshkini dombyra men gıtaranyń súıemeldeýimen shyrqalǵan ánder qosynyna ulasty.
Muqaǵalıdyń «Áıel degen ádemi ǵoı, ádemi, ádemilik bizge kóptik etpeıdi» dep túıindeletin shýmaqtary Júrsin Ermannyń «Qaı jerde, meıli, qaı elde, álemniń máni – áıelde» degen jyryna jalǵasyp jatty. Jáne bul óleńniń shýmaǵyn biri bastap, ekinshisi ilip áketip otyrǵanda... Kóńil kóteriledi-aq. Osy ujymdaǵy Dúısenáli Álimaqyn, Batyrhan Sársenhan atty jas aqyndar óz týyndylaryn ǵana oqyp qoımaı, aǵylshyn, qytaı, túrik, orys tilinde óleńder juptady. Al ánge kezek kelgende áý demeıtin qazaq joq. Dombyrada – «Dýdar-aı», gıtarada – «Sáýlem-aı», taǵy basqa qazaq ánderi shyrqaldy.
Arýlar toıy, analar meıramy qutty bolsyn!