Qazir qoǵamda mesenat qyz-kelinshekterdiń qatary kóbeıip keledi. Bul endi-endi damyp kele jatqan qubylys ekeni málim.
Belgili bir salaǵa nemese jekelegen azamattarǵa qarjylaı qaıyrymdylyq jasaýdy mesenattyq dep ataǵanymyzben, onyń da ártúrli ózgeshelikteri jáne halyqtyq erekshelikteri baryn baıqaýǵa bolady. Máselen, mesenattyq uǵymy Rım jerinen shyqqanymen, bul qazaq dúnıetanymyna da jat emes. Onyń bir kórinisi – halyqtyq folklorymyzda qaıyrymdylyqtyń úlgisi retinde Atymtaı Jomart esimin kúni búginge deıin qoly ashyq adamǵa telip, solaı áspettep, ádipteımiz. Al saqılyq, myrzalyq, qaıyrymdylyq sekildi sózderdiń qaı-qaısysy bolsyn halqymyzdyń jomarttyqqa ejelden jany jaqyn ekenin bildirse kerek. Áıtkenmen, ár sózdiń ózindik astary men aıyrmasy baryn baıqaý qıyn emes sekildi. Máselen, qaıyrymdylyqty joq-jitikke, muqtaj adamǵa kómektesý dep bilemiz. Al mesenattyq kóbinese mádenı qundylyqtarǵa jasalatyn demeýshilik ekeni túsinikti.
Qazirgi bizdiń qoǵamdaǵy áıelderdiń mesenattyqtan góri áleýmettik qaıyrymdyqqa beıim ekeni baıqalady. Qazir elimizde ondaı jomart júrekti qyz-kelinshekterdiń esimderi kóptep atalyp júr. Onyń biri de biregeıi – belgili kásipker, mesenat Saıra Mataıbaeva hanym. Bolmysy názik bolǵanymen, rýhy asqaq Saıra Áıtenqyzy – otyz jyldan beri elimizdiń jıhaz óndirisin damytýǵa kúsh salǵan kásipker. Saıra hanym respýblıkalyq Isker áıelder qaýymdastyǵynyń Aqmola oblysy boıynsha jetekshisi. Qosshy qalasynda jeke qarajatyna 700 balaǵa arnalǵan «Dara» bıznes mektebiniń, balalarǵa arnalǵan teatr jáne sport kesheniniń irgetasyn qalady. Osylaısha, Astana irgesindegi Qosshy qalasynyń ekonomıkalyq-áleýmettik damýyna zor úlesin qosyp keledi.
«Otyz jyldan keıin men bilim salasyna bet burdym. Buǵan sebepker bolǵan – meniń kásipornym ornalasqan Qosshyda mektepterdiń jetkiliksizdigi. Balalar úsh aýysymda, bir synypta qyryq baladan oqýǵa májbúr boldy. Iаǵnı bul eshqandaı sapaly bilim berýge jatpaıdy. Osy sátte men óz elimniń patrıoty, sol kezdegi aýdandyq máslıhat depýtaty retinde mektep salýdy sheshtim, – deıdi ol.
Búginde Qosshy jurty ony túrli salada qaıyrymdylyq jasap, halyq kóńilinen shyǵyp júrgen qazaqtyń qaısar qyzy dep baǵalaıdy. «Oń qolyńnyń bergenin sol qolyń bilmesin» deıdi ǵoı. Sondyqtan pálen dep ne deımiz. Qashanda kómekke zárý salaǵa qaderı-halimizshe qolushyn sozýǵa daıynbyz. Ásirese óskeleń jas urpaqtyń bolashaǵyna salǵan qarjy el bolashaǵyna salǵan ınvestısııa dep bilemin», deıdi mesenat hanym.
«Saıra Áıtenqyzy 20 jyldan beri Qosshyda turady. Osy jerde alǵash jıhaz óndirisin ashty. Astana irgesindegi Qosshy qalasynda halyq tyǵyz qonystanǵandyqtan, mektep tapshylyǵy eń bir kúrdeli másele bolyp keldi. Osyǵan oraı, tipti soltústik óńirde alǵash ret dep aıtýǵa bolady, óz qarajatyna zamanaýı úlgide tamasha mektep saldy. «Dara» bıznes akademııasy – qazir elimizdegi úzdik úlgili mektepterdiń biri. «Dara» mektebiniń daralyǵy ulttyq qundylyqtarǵa erekshe mán beredi. Qazir munda balalardy at sportyna baýlıdy. Mysaly, sársenbi kúni onda túgel ulttyq kıim kıedi. Beısenbide elimizge belgili kásipker tulǵalardyń leksııasy oqytylady. Sonymen qatar balalarǵa arnalǵan teatrlyq qoıylymdar qoıylyp turady. Bıyl 200 oryndyq konserttik zal saldy. Buǵan qosa Saıra Áıtkenqyzy – qalamyzda áli de jetispeı jatqan memlekettik tetikterdi de qoldap otyrǵan qazaqtyń mesenat qyzy. Bir qalanyń el anasy bolyp otyr desek, artyq aıtqandyq bolmas», deıdi Qosshy qalasy ishki saıasat bóliminiń basshysy Aınagúl Kóńbaıqyzy.
Saıra Áıtkenqyzy 2016 jyly «Jomart júrek», 2018 jyly «Jyl tulǵasy» atalymdarynyń jeńimpazy bolsa, 2019 jyly Tuńǵysh Prezıdent qory uıymdastyrǵan «Meıirimdilik kerýeni» respýblıkalyq qaıyrymdylyq baıqaýynyń laýreaty atanǵan.
«Qalamyzdaǵy taǵy bir mesenat tulǵa – Sholpan О́tegenova hanym. Sholpan Ǵajaıypqyzy kóp jyl memlekettik jáne bilim salasynda qyzmet etti. Aqmolada alǵashqylardyń biri bolyp «Balapan» baǵdarlamasymen jeke balabaqsha ashyp, urpaq tárbıesine zor úles qosyp keledi. Qazir ol kisiniń Qosshydaǵy balabaqshalarynda 200-deı bala oqıdy. Onyń ishinde kópbalaly jáne jaǵdaıy tómen otbasynan shyqqan balalardy tegin oqytyp otyr. Sonymen qatar óz qarajatymen jyl saıyn Qosshy qalasynda jas aqyndar aıtysyn ótkizip, jas ónerpazdardy qoldaýdy dástúrge aınaldyrdy. Sholpan Ǵajaıypqyzy – jalpy ónerge, mádenıetke, ádebıetke, ǵylymǵa úlken qamqorlyq jasaıtyn jomart jan. Sonymen qatar Baıan Sunnatqyzy – Qosshy qalasynyń ishki týrızmin damytýǵa zor úles qosyp otyrǵan mesenat hanymdardyń biri. Olardyń qaı-qaısysy da mesenattyqpen qatar, qalamyzdaǵy kómekke muqtaj jandarǵa únemi áleýmettik qaıyrymdylyq jasap keledi», deıdi A.Kóńbaıqyzy.
«Teńiz dámi – tamshysynan» degendeı, bul elimizdegi qaısar qyzdardyń bir parasy ǵana. Mundaı asyl analar elimizdiń qaı pushpaǵynan da tabylatynyna esh talasymyz joq.