Kóp jaǵdaıda kásiporyndardaǵy aýyr jumysty tek er-azamattar isteıdi dep oılaımyz. Alaıda Aqtóbe ferroqorytpa zaýytynda talaı jyldan beri eńbek etip kele jatqan áıel zatynyń úsh býyn ókilin keziktirýge bolady.
Áýlettiń ishinen alǵash bolyp 1988 jyly kásiporynǵa Aqzıra Qusaıynova jumysqa turǵan. Sebebi turyp jatqan Elek eldi mekeni zaýytqa jaqyn edi. Aqzıra apa ferroqorytpa zaýytynyń ákimshilik-sharýashylyq bóliminde tehnıkalyq qyzmetshi bolyp 21 jyl úzilissiz eńbek etip, 2019 jyly zeınetke shyqty. Arada az ýaqyt ótkende osy zaýytqa Aqzıra apaıdyń qyzy Gúlzada keldi.
«2000 jyly jumys istep jatqan mekemem jabylǵan soń, zaýytqa keldim, – deıdi energetıkalyq sehtyń mamany Gúlzada Temirova. – Sol ýaqytta qazirgi 900 oryndyq turmystyq korpýstyń ornynda jóndeý-qurylys sehy bolatyn. Ol bólimshede ǵımarattar men peshterdi jóndeý jumystarymen aınalystyq. Áıelderden quralǵan syrlaýshylar brıgadasynda 10 jyl jumys istedim. Keıin bólimshe taratylyp, qyzmetkerler basqa sehtarǵa aýysa bastady. Men energetıkalyq sehtyń kondısıoner mashınısi qyzmetine kiristim. Al eki jyl buryn atalǵan qurylǵynyń apparatshysy atandym, sonysymen jaýapkershiligim de artty».
Pandemııa bastalǵaly Gúlzadanyń da jumysy kóbeıdi. Sebebi ol qalanyń aýrýhanalaryna jetkizilip jatqan otteginiń tazalyǵyna jaýapty bolatyn. Zaýyttyń osy ýchaskesinde tazalyǵy 99,9% joǵary, medısınalyq maqsattarǵa jaramdy ottegi óndiriledi. Syn saǵatta kásiporyn emdeý mekemelerine táýligine 800 ballon jetkizip turdy.
«Sol sátte bárimiz qınaldyq. Ásirese medısınalyq mekemelerge ballon tıep júrgen jigitterdiń jumysy aýyr edi. Men otteginiń tazalyǵyna jaýapty edim. Adam jetpeı jatqandyqtan, túngi aýysymǵa eki-úsh adamnan qalyp júrdik. Tipti isten shyqqan qurylǵyny óz qolymyzben jóndeıtinbiz. Adamdardyń ómirin aman saqtap qalýǵa úlesimizdi qosyp júrgendikten, sharshaý degendi umyttyq», deıdi Gúlzada Saǵyntaıqyzy.
Kóp keshikpeı Gúlzadanyń qyzy Sabına Ǵazızova da zaýytqa jumysqa keldi. Qazir de ol hımııa zerthanasynda jumys isteıdi. 2019 jyly Almatyda oqý bitirip, óz mamandyǵy boıynsha sol qalada eńbek etip júrgende pandemııa bastalyp, onyń ata-anasy epıdemııalyq jaǵdaı turaqtalǵansha Aqtóbede bola turýyn qalady. Biraq jastaıynan eńbekqor Sabına úıde kóp otyra almaı, zaýytqa qujatyn tapsyrdy. Suhbattasýdan sátti ótip, rentgenspektrli taldaý zerthanashysy bolyp kásiporynǵa kirdi. Qazir ol – zerthanada metall quramynyń sapasyn tekseretin maman.
Gúlzada qyzynyń óz mamandyǵy boıynsha jumys istep jatqanyna rıza. Onyń pikirinshe, tutynýshylar sapaly taýar alsa, kompanııaǵa degen senim de, úmit te artady. Kompanııada jastarǵa barlyq jaǵdaı jasalǵan. Ol zaýyt qyzmetkerleriniń birneshe mamandyqty meńgerýi ózi úshin de, otbasy úshin de mańyzdy dep esepteıdi.
Qambar MUQASh
Aqtóbe