«Amanat» partııasynyń respýblıkalyq saılaýaldy shtaby músheleriniń óńirlerdegi saılaýshylarmen kezdesýleri jalǵasyp jatyr. Jýyrda partııalyqtar Shymkent qalasynda bolyp, bıznes-qaýymdastyq ókilderimen shaǵyn jáne orta kásipkerlikti qoldaý máselelerin talqylady.
Partııa tóraǵasy Erlan Qoshanov partııa shaǵyn jáne orta bıznes úshin elde bıznes júrgizý boıynsha qarapaıym erejelerdi qamtamasyz etýdi jalǵastyratynyn atap ótti. «Biz jeke bastamalar men naryqtyq ekonomıkanyń kúshine senemiz. Partııa zańnama deńgeıinde ekonomıkadaǵy monopolııany joıýǵa jáne adal básekelestikti damytýǵa qol jetkizedi. 2027 jylǵa deıin biz kem degende 15 myń artyq retteýshi kedergini joıamyz», dedi E.Qoshanov.
Onyń aıtýynsha, «Amanat» partııasy mashına jasaý, metallýrgııa, tamaq jáne jeńil ónerkásipte júzdegen jańa kásiporyn qurýǵa yqpal etedi, onda jyl saıyn keminde 40 myń sapaly, joǵary jalaqy tólenetin jumys orny ashylady. Shtab músheleri «Asar» shaǵyn aýdanynyń turǵyndarymen ınfraqurylymdy damytý jáne turǵyn úıge qoljetimdilikke qatysty ózekti máselelerdi talqylady. Qala turǵyndary ınjenerlik jelilerdiń tozýy, kommýnaldyq tarıfter qunynyń joǵarylaýy, abattandyrý jáne jasyl jelek taqyryptaryn qozǵady. Partııa saılaýaldy ýádelerin oryndaý aıasynda Shymkentte 5,5 mln sharshy metr turǵyn úı salý, jaqsy jáne qanaǵattanarlyq jaǵdaıdaǵy avtomobıl joldarynyń úlesin 67,4%-dan 85%-ǵa deıin kóbeıtý, aýlalarda 100 ashyq sport alańyn salý jáne kóshelerdi jaryqtandyrý máselesin tolyǵymen sheshý josparlanyp otyr.
Amanattyqtar qaladaǵy «Belsendi uzaq ómir súrý» ortalyǵyna baryp, aǵa býyn ókilderine zeınet jasyndaǵy adamdardyń ómir sapasyn jaqsartý jónindegi partııanyń bastamalary týraly aıtyp berdi. Osy kúni «Aına» bazarynda ózin-ózi jumyspen qamtyǵan jastarmen ekspromt-kezdesý ótti. Shymkentte partııanyń saılaýaldy baǵdarlamasy aıasynda 6 myńnan astam jas tegin kásiptik bilim, 32 myń adam kásipkerlik negizderin oqýǵa múmkindik alady jáne 5 myń jas alǵashqy jumys oryndarymen qamtamasyz etiledi.
Úgit-nasıhat naýqany bastalǵannan beri 17 kún ishinde amanattyqtar 1 871 300 adam qatysqan 19 myń is-shara ótkizdi. Qoǵamdyq qabyldaý bólmelerine saılaýshylardyń 14 700-den astam usynys-pikiri kelip tústi.