Ortalyq kommýnıkasııalar qyzmeti alańynda «Astana Balet» teatrynyń mereıtoılyq maýsymǵa arnalǵan is-sharalar jospary tanystyryldy. Alqaly jıynda teatr dırektory Aleksandr Sovostıanov, kórkemdik jetekshi Nurlan Qanetov, bas dırıjer Arman Orazǵalıev, sondaı-aq Urker tobynyń músheleri Aıdos Saǵat pen Rústem Mýsın baıandama jasady.
Ortalyq kommýnıkasııalar qyzmeti alańynda «Astana Balet» teatrynyń mereıtoılyq maýsymǵa arnalǵan is-sharalar jospary tanystyryldy. Alqaly jıynda teatr dırektory Aleksandr Sovostıanov, kórkemdik jetekshi Nurlan Qanetov, bas dırıjer Arman Orazǵalıev, sondaı-aq Urker tobynyń músheleri Aıdos Saǵat pen Rústem Mýsın baıandama jasady.
Atalǵan óner ordasy bıylǵy onynshy mereıtoılyq maýsymnyń ekinshi jartysynda da kórermen nazaryna qyzyqty ári mazmundy baǵdarlama usynbaq. Onyń ishinde teatr repertýaryndaǵy úzdik qoıylymdar, jańa premeralar, tanymal ártistermen, ujymdarmen birlesken is-sharalar men gastroldik saparlar bar. Teatr dırektory Aleksandr Sovostıanovtyń aıtýynsha, 21-22 naýryzda «Astana Balet» sahnasynda mádenı qubylysqa aınalǵan Urker tobynyń 30 jyldyǵy qarsańynda teatrdyń sımfonııalyq orkestrimen birlesken konsertke daıyndyq júrip jatyr. Bul kesh mamyr aıynda Almaty qalasynda da ótkiziledi.
«Maýsymnyń taǵy bir erekshe qoıylymy – talantty ártister Svetlana Zaharova men Dıana Vıshneva óner kórsetetin «Karmen-sıýıta» spektakli. Biri sáýir aıynda, ekinshisi mamyr aıynda Almatydaǵy gastrol barysynda sahnaǵa shyǵady. Spektakl orkestrdiń súıemeldeýimen ótedi. J.Bıze – R.Shedrınniń mýzykasyna kýbalyq horeograf Alberto Alonso qoıǵan, tehnıkalyq oryndalýy turǵysynan asa kúrdeli ári býyrqanǵan sezimge toly «Karmen-sıýıta» baleti sátti shyǵady dep oılaımyn. Budan bólek Qazaqstandaǵy Fransııa elshiligi jyl saıyn «Frankomfonııa kóktemi» degen ataýmen mádenı is-sharalar ótkizedi. Bıyl teatr ónerin súıer qaýym úshin elshiliktiń ǵalamat tartýy da daıyn. Fransııanyń Rue des arts ujymy elimizde alǵash ret óner kórsetip, áıgili Costard qoıylymyn 9 sáýirde «Astana Balet» teatrynyń sahnasynda pash etedi», dedi Aleksandr Sovostıanov.
Sonymen birge 15-16 sáýirde qos premera tanystyrylmaq. Aınur Ábilǵazınanyń «Soli Deo Gloria» jáne Oljas Mahanbetálıevtiń «Nine» atty zamanaýı bir aktili baletterine búginde qyzý daıyndyq júrip jatyr. Al 1 mamyrda I respýblıkalyq «Ashyq sahna» baıqaýynyń jeńimpazdaryn saltanatty marapattaý rásimi ótip, «Jeti qazyna» horeografııalyq mınıatıýrasynyń premerasy kórsetiledi. Aıta keteıik, osy baıqaýdyń arqasynda horeografııa óneri salasyndaǵy daryndy horeograf, ssenograf, kompozıtor, ssenarıster top jarǵan edi. Dúbirli doda zamanaýı otandyq horeografııany damytýda tyń ıdeıalar men formalardy taýyp, balet óneri salasyndaǵy ulttyq dástúrdiń barynsha tamyr jaıýyna yqpaldasý maqsatynda bastaý alǵan.
«Teatr ujymy 22-23 sáýirde Aqtóbe qalasyna gastroldik saparyn ótkizip, Ǵ.Jubanova atyndaǵy Aqtóbe oblystyq fılarmonııasynyń sahnasynda Rıkardo Amaranteniń «A Fuego Lento» jáne Djordj Balanchınniń «Serenada» baleti usynady. 13-21 mamyr kúnderi aralyǵynda «Astana Balet» teatrynyń ujymy álemdik jáne otandyq klassıka jaýharlary men biregeı horeografııalyq qoıylymdaryn Almatynyń talǵampaz kórermen qaýymyna tartý etedi. Almaty Theatre sahnasynda Dj.Balanchınniń «Serenada», A.Alonsonyń «Karmen-sıýıta», I.Kılıannyń «Joldan taıǵandar», Karına Abdýllınanyń «Taǵdyr bultarystary» jáne Mýkaram Avahrıdiń «Salomeıa» sekildi týyndylary kórsetiledi. Al maýsymnyń jabylýynda klassıkanyń bıik úlgilerinen bastap, zamanaýı horeografııa óneriniń biregeı týyndylary pash etiledi», dedi teatr dırektory.
Aıta keteıik, atalǵan joba-josparlar Mádenıet jáne sport mınıstrliginiń qoldaýymen júzege asyrylady.