Ázerbaıjanda «Búgingi álem: syndar men úmitter» taqyrybyndaǵy H Baký jahandyq forýmy ótti. Forým jumysyna Aqparat jáne qoǵamdyq damý mınıstri Darhan Qydyráli qatysyp, sóz sóıledi.
Onynshy ret ótkizilip otyrǵan forýmnyń ıntellektýaldyq platformaǵa aınalyp kele jatqanyn atap ótken Darhan Qydyráli Prezıdent Qasym-Jomart Toqaevtyń BUU Bas Assambleıasynyń 77-sessııasynda sóılegen sózin eske saldy. «Memleket basshysy tártip pen jaýapkershilikke negizdelgen halyqaralyq júıe búgingi haos pen belgisizdik aldynda ese jiberip alǵanyn aıtqan edi», dedi mınıstr.
Sondaı-aq D.Qydyráli Qazaqstannyń táýelsizdiktiń alǵashqy kúnderinen álemdegi tórtinshi ıadrolyq áleýetten bas tartyp, Semeı polıgonyn jaýyp, halyqaralyq qaýymdastyq aldynda ıadrolyq qarýsyz álem qurýdaǵy tabandylyǵyn kórsetkenin, bul jahan problemasyn jumyla sheshýdegi Qazaqstannyń úlesi ekenin aıtty. Mınıstr jahannyń jáne aımaqtyń aldynda turǵan syn-qaterler, onyń ishinde klımattyń, azyq-túliktiń jáne ıadrolyq qaýipsizdikpen qatar, postshyndyq dáýirinde beleń alǵan gıbrıd soǵystary, ınfodemııa qubylystary aqparattyq qaýipsizdikke de erekshe nazar aýdarý qajet ekenin kórsetip otyrǵanyn atap ótti.
«Gıbrıdti soǵystar men ınfodemııa bizdiń kúndelikti ómirimizdiń bir bóligine aınaldy. Bul aqparattyq qaýip jáne aqparattyq soǵystyń shegi joq. Kıberqylmystyń ósýi bizdiń ómirimizdiń barlyq salasyna, sonyń ishinde aýyl sharýashylyǵy, sýmen jabdyqtaý, qarjy, qaýipsizdik, kólik, energetıka, ǵarysh jáne sýasty kommýnıkasııalaryna shabýyldar kóbeıgen saıyn aıqyn kórinedi. Qajetti resýrstardy, tehnologııalyq sheshimderdi, sondaı-aq osy saladaǵy mamandardy daıarlaýdyń mańyzdy mindeti», dedi mınıstr.
Jańa tehnologııanyń damýy adam ómirine artyqshylyq berýmen qatar, syn-qaterlermen de betpe-bet keltirip otyr.
«Kóptegen ǵalym jasandy ıntellekt memleketterdiń jumysyn jaqsartady jáne HHI ǵasyrda qoǵamnyń kúrdeli máselelerin sheshedi dep boljaıdy. Alaıda medıa men sıfrlandyrýdaǵy etıka máselesi aldan shyǵyp otyr. Sondyqtan jasandy ıntellektini durys paıdalanýdy retteý, sondaı-aq ony qoldaný quqyǵyn qalyptastyrý máseleleri zııatkerlik ortada keńinen talqylanýǵa tıis», dedi D.Qydyráli óz sózinde.
Sonymen birge mınıstr Kaspıı teńiziniń ekologııalyq jaǵdaıyna da nazar aýdarý qajet ekenin tilge tıek etti.
«Kaspıı teńizi – balamasy joq sý basseıni jáne bes el ekonomıkasynyń bazalyq resýrsy. Alaıda ǵalymdardyń zertteýinshe, XXI ǵasyr sońynda Kaspııdegi sý kólemi azaıýy múmkin. Bul aımaqtaǵy ekojúıe men ekonomıkalyq qaýipsizdikke syn-qater tóndiredi», dep atap ótti D.Qydyráli.
Osymen 10-ret ótkizilip otyrǵan Baký jahandyq forýmyna Ázerbaıjan Respýblıkasynyń prezıdenti Ilham Álıev, álemniń belgili saıası qaıratkerleri men ǵalymdar qatysty.
Aıta ketý kerek, Qazaqstan delegasııasy quramynda ǵylymı-zertteý ortalyqtary men mınıstrlikke qarasty mekemelerdiń ókilderi boldy.