Jalpyulttyq sosıal-demokratııalyq partııasynyń músheleri, Parlament Májilisiniń depýtattyǵyna birmandattyq aýmaqtyq saılaý okrýgi boıynsha kandıdat Valerıı Smokvın men oblystyq máslıhat depýtattyǵyna kandıdat Janǵalı Ilııas «Kókshetaý mıneraldy sýlary» AQ eńbek ujymymen kezdesti.
Is-shara barysynda kandıdattar partııanyń saılaýaldy baǵdarlamasynyń basym baǵyttary jóninde baıandady. Onyń ishinde sybaılas jemqorlyqqa qarsy kúreske baǵyttalǵan usynystar saılaýshylardyń erekshe qyzyǵýshylyǵyn týdyrdy.
«Turǵyndar «paramen ustaldy» degen aqparatqa selk etpeıtin boldy. Jemqorlardy quryqtaıdy degen qyzmetkerlerdiń ózderi keıde paramen ustalyp jatady. Jemqorlyqpen kúres is-sharalary júıeli jalǵasyp jatyr dep urandatqanymen, kóleńkeli qylmysqa jol berýshilerdiń sany azaımaı tur. Sonyń ishinde, jaýapty memlekettik laýazymdy atqaratyn jáne memlekettik fýnksııalardy oryndaýǵa ýákilettik berilgen azamattardyń qyzmettik ókilettikterin teris jáne zańsyz paıdalaný, kásipkerlik qyzmetke zańsyz aralasý, kedergi jasaý, para alý, para berý, paraqorlyqqa deldal bolý, qyzmettik jalǵandyq, jeke jáne zańdy tulǵalardyń zańsyz materıaldyq syıaqy berý syndy sybaılas jemqorlyq derekteri de el aýmaǵynda áli beleń alyp otyr. Memleket bıýdjetin maqsatsyz paıdalaný, qyzmet babyn jeke bas paıdasyna jaratý, jumysqa qabyldaý barysynda belgili bir qarajat mólsherin talap etý, tekseris mekemeleriniń kelýine oraı qarjy jınaý sekildi sybaılas jemqorlyq táýekelderi de qazir qoǵamda jıi ushyrady. Eń aldymen, zań ústemdigin ornatyp, naǵyz quqyqtyq memleket qurý úshin jemqorlyqtyń tamyryna balta shabý kerek. Quqyq qorǵaý organdary batyl áreket etpeı, sybaılas jemqorlyqpen tıimdi kúres júrgizý múlde múmkin emes. Kóp jyl boıy olar máseleni tereń zerttemeı turyp, para alýshylardy qylmys ústinde ustap keldi. Ártúrli adam bir laýazymdy atqaryp otyryp, birdeı máselelerdi sheshkeni úshin kináli dep tanylǵan. Al sybaılas jemqorlyqtyń beleń alýyna qatysty sebepter men jaǵdaılar eshkimdi qyzyqtyra qoımaǵan. Tek sońǵy jyldary ǵana osy máselege nazar aýdaryla bastaǵany baıqalady», dedi Valerıı Smokvın.