Prezıdenttik jastar kadrlyq rezerviniń músheleri salyq saıasatynyń ózekti máselelerin talqylady, dep habarlaıdy Egemen.kz.
Astanada Ulttyq ekonomıka mınıstri Álibek Qýantyrov PJKR múshelerimen kezdesý ótkizdi. Jıynda jańa Salyq kodeksiniń jobasy talqylandy. Sondaı-aq kezdesýge Ulttyq ekonomıka vıse-mınıstri Azamat Ámrın, QR QM Memlekettik kirister komıteti tóraǵasynyń orynbasary J. Nurjanov, QR UEM Salyq jáne keden saıasaty departamentiniń dırektory Erlan Saǵynaev qatysty.
UEM basshysy atap ótkendeı, osy qujatty ázirleý jónindegi jumys tobynyń quramyna memlekettik organdardyń ókilderi, salyq salý salasyndaǵy sarapshylar jáne kásipkerler kirdi.
«Mınıstrlikte jańa jyldan bastap jańa Salyq kodeksiniń jobasyn talqylaý bastaldy. Ol salyqtyq ákimshilendirýdi túbegeıli qaıta qaraýdy, sıfrlandyrýdy, sán-saltanat salyǵyn engizýdi kózdeıdi. Budan bólek, salyq mólsherlemelerin saralaý, údemeli tabys salyǵynyń tetikterin qarastyrý boıynsha jumys júrgiziletin bolady», dedi Á.Qýantyrov.
Kezdesý barysynda qatysýshylar salyqtyq ákimshilendirýdi jeńildetý - bıznes sýbektileriniń basty suranystarynyń biri bolyp tabylatynyn atap ótti. Jumys berýshilerge júktemeni azaıtý maqsatynda eńbekaqy tóleý qorynan tólemder sanyn jeńildetý jáne qysqartý boıynsha jumysty jalǵastyrý qajet.
Sondaı-aq kórshi elderge eksporttaı almaıtyn jer qoınaýyn paıdalanýshylarǵa preferensııalar berý jáne JTS (jeke tabys salyǵy) progressıvti shkalasyn engizý boıynsha usynystar aıtyldy. Sonymen qatar bıznes sýbektilerin tartý úshin tabys shegin alyp tastaý jáne bólshek salyq rejımi boıynsha qyzmetti keńeıtý usynyldy.
Sán-saltanat salyǵy jyljymaıtyn múlik obektileriniń sanymen emes, olardyń qunymen eseptelýi kerek deıdi qatysýshylar. Sonymen qatar olar baǵaly qaǵazdar naryǵy boıynsha salyq salý kezinde paıdaly mámilelermen qatar, jyl qorytyndysy boıynsha saldony esepteý úshin teris mámilelerdi de eskerýdi suraıdy.
Kezdesý qorytyndysy boıynsha mınıstr barlyq qatysýshylarǵa belsendiligi úshin alǵysyn bildirip, aıtylǵan usynystar qosymsha zerdelenetinin jetkizdi.