Isa Baızaqov atyndaǵy Pavlodar oblystyq fılarmonııasynyń konsert zalynda Qazaqstan Respýblıkasynyń eńbek sińirgen ártisi, Qazaq Ulttyq óner ýnıversıtetiniń professory Turar Álipbaevtyń «Kúı ǵumyr» atty keshi ótti.
Tula boıyna týa bitken erekshe ónerin Kereký jurtyna pash etken kúıshi bul kúni úlken tebirenispen birneshe kúıdi erekshe mánerde oryndady. Sonyń biri – Oqap Qabıǵojınniń «Adasqaq» kúıi.
Bul týyndy – kóńil kúıdiń, ómir bulqynysynyń kúıi. Birden shymyr, tógiltip bastalatyn dombyra sazy kókke órlep, birde ornynda quıqyljyp, endi bir mezette quıyndy sátterge silteıdi. Kúıshiniń býnaqtaǵy sheber saýsaqtary birtindep tómen tarta bastap edi, ózin ishten jazǵyrǵan, ótkennen sabaq alǵan qasiretti jannyń kúrsinisi de qulaqqa jetkendeı boldy. «Adasqaq» daýyldatyp baryp aıaqtalatyn kúı eken. Bul kúı avtorynyń ishki tebirenisi, aldaǵy qýanyshty kúnderge degen seniminiń sergektigi dep uǵyndyq.
Turar Álipbaevtyń aıtýynsha, 1934 jyly áıgili kompozıtor, dırıjer Ahmet Jubanov Almatyǵa Qazaqstannyń ár túpkirinen men degen úzdik kúıshilerdi jınaıdy. Sonda 70-ke jýyq kúıshi kelip, sonyń ishinde tek segiziniń oryndaýyndaǵy kúıler Máskeý qalasynda úntaspaǵa jazý úshin tańdalyp alynǵan eken. Osy úrkerdeı topta Oqap Qabıǵojın de bolǵan. О́ner ıesi kúı atasy Qurmanǵazy men Dınanyń mýzykalyq murasyn nasıhattaýshy edi. Odan bólek, Jantóre, Túrkesh, Soqyr Esjan, Dáýletkereı sııaqty halyq sazgerleriniń baǵa jetpes kúılerin saqtap, jańǵyrtyp mýzykalyq horǵa qosýymen qatar, kóptegen jasty dombyrashylyq ónerge baýlydy. 1939 jyly Máskeýde ótken halyq talanttarynyń búkilodaqtyq baıqaýyna qatysqan. О́zi shyǵarǵan kúıleriniń ishindegi qomaqtysy – «Adasqaq» kúıi. «Adasqaqty» kezinde Ertis-Baıan óńiriniń týmasy, Qazaq KSR halyq ártisi, kúıshi-dombyrashy Rústembek Omarov ta sheber oryndaǵan. Úntaspada saqtalyp qalǵan nusqasy bar. О́kinishke qaraı, bul kúıdi biletinder qazirgi ýaqytta óte sırek.
Konsertte Turar Álipbaev Qurmanǵazynyń «Baıjuma», Esirdiń «Aqjarma», О́skenbaıdyń «Bulbul aqjeleń», Dınanyń «Bulbul», Qazanǵaptyń «Kókil», «18 jasar Baljan qyz», «Saý bol, Baljan», Q.Ahmedıarovtyń «Túbek tolǵaý» jáne taǵy basqa kúılerdi naqyshyna keltirip oryndady. Rýhanı keshte oblystyq fılarmonııanyń Rústembek Omarov atyndaǵy qazaq ult aspaptar orkestri kúıshiniń shyǵarmashylyǵynan týǵan birneshe kúıdi tartý etti. Aıta keteıik, bul orkestrdiń kórkemdik jetekshisi ári bas dırıjeri Qazaqstannyń eńbek sińirgen qaıratker Talǵat Kárimov.
PAVLODAR