Elordadaǵy «Alaý» muzaıdynynda mánerlep syrǵanaýdan IV qysqy jastar sport oıyndary óz máresine jetti. Úsh kúnge jalǵasqan básekede elimizdiń 11 óńirinen (3 qala men 8 oblys) 100-ge tarta sportshy baq synady.
Sportty damytý dıreksııasynyń málimeti boıynsha, eresekter arasyndaǵy jarysta halyqaralyq baıraqty dodalarda el namysyn qorǵap júrgen ulttyq qurama ókilderi júldeni ózara bólisti. Máselen, erler sanatyndaǵy «Sport sheberi» razrıadynda el chempıony, Máskeýdegi Rýster kýbogi men Ystanbuldaǵy Bosfor kýbogi jáne Gdanskidegi Gran-prı saıysynda kúmis, Bolgarııada uıymdastyrylǵan «Sofia Trophy» týrnırinde qola júlde alǵan Mıhaıl Shaıdorov jeńiske jetti. Ol eki baǵdarlama qorytyndysy boıynsha 254,98 upaı jınap, óz myqtylyǵyn taǵy bir márte dáleldedi. Ekinshi jáne úshinshi oryndarǵa halyqaralyq jarystarda baq synap júrgen talantty jastarymyz – Dıas Jırenbaev (209,71 upaı) pen Rahat Bralın (200,94 upaı) ıe boldy.
Al dál osy sanattaǵy burymdylar básekesinde elordalyq Anna Levkoves top jardy. Nurııa Súleımen (Astana) kúmis júldeger atansa, Sofııa Farafonova (Almaty qalasy) úzdik úshtikti túıindedi.
IV qysqy jastar sport oıyndardyń jeńimpazy Mıhaıl Shaıdorov bul jarysqa álem chempıonatyna tyńǵylyqty daıyndalý úshin qatysqanyn aıtty.
«Bul oıyndarǵa 2 aptadan keıin Japonııanyń Saıtama qalasynda alaýy tutanatyn álem chempıonaty qarsańynda óz sheberligimdi baıqap kórý úshin keldim. О́z ónerime kóńilim toldy. Baǵdarlamama birqatar kúrdeli elementterdi qostym. Budan da joǵary upaı alýǵa bolatyn edi, biraq alda mańyzdy jarys kútip turǵan soń bar ónerimdi ortaǵa salǵan joqpyn», deıdi Mıhaıl Shaıdorov.
Sondaı-aq qysqy jastar sport oıyndarynda «Sport sheberliginen úmitker» sanatynda Nıkıta Kozlov (erler) pen Zere Sarbalına (qyzdar), «Birinshi sport» razrıadynda Tımýr Ádilhanov (erler) pen Nurııa Qamysbaı (qyzdar), «Ekinshi sporttyq» razrıadynda Jahongır Abylqasymov (erler) pen Sofııa Petrova (qyzdar) úzdik shyqty.
Jarys qorytyndysy boıynsha, jalpykomandalyq esepte Astana qalasynyń sportshylar top jarsa, Almaty qalasynyń ókilderi ekinshi, Qaraǵandy oblysynyń órenderi úshinshi orynǵa ıe boldy. Marapattaý rásimine Sportty damytý dıreksııasy dırektorynyń orynbasary Azamat Imashev, Ulttyq konkı tebýshiler federasııasynyń vıse-prezıdenti Elmıra Týrganova qatysty.
Aıta keteıik, 20-26 naýryz aralyǵynda Japonııanyń Saıtama qalasynda uıymdastyrylatyn mánerlep syrǵanaýdan álem chempıonatynda Qazaqstannyń namysyn úsh sportshy qorǵaıdy. Atap aıtsaq, Mıhaıl Shaıdorov muzdaǵy bı básekesinde baq synasa, Gaýhar Naýryzova men Boısangýr Datıev juptyq saıysta óner kórsetedi. Sondaı-aq qosalqy quramda Dıas Jırenbaev esimdi jas óren bar.