Búgin Memleket basshysy Qasym-Jomart Toqaev Premer-mınıstrdiń, memlekettik organdar basshylarynyń, oblystar men Astana, Almaty, Shymkent qalalary ákimderiniń qatysýymen keńes ótkizdi. Keńes barysynda túrli áleýmettik jáne saıası máseleler qozǵaldy. Prezıdenttiń aıtýynsha, sońǵy ýaqytta el óńirlerinde belgili adamdarǵa eskertkish ornatý sánge aınalyp bara jatyr, dep habarlaıdy Egemen.kz Aqordanyń baspasóz qyzmetine silteme jasap.
«Sońǵy kezde bir aımaqqa ǵana belgili adamdarǵa eskertkish ornatý sánge aınaldy. Jergilikti onomastıka komıssııalary buǵan jol bermeýge tıis. Orynsyz sheshimderge Respýblıkalyq komıssııa tosqaýyl qoıýy kerek. Árkim óz babasyna eskertkish qoıa berse, elde rýshyldyq, jershildik beleń alady. Osyǵan nazar aýdaryńyzdar», dep eskertti Qasym-Jomart Toqaev.
Bul rette Prezıdent keı adamdardyń ómirinde múlde bolmaǵan erlik isterge toly ómirbaıandary oıdan qurastyrylyp jatqanyn da tilge tıek etti.
«Keńestik kezeń qaıratkerlerine, sonyń ishinde jappaı qýǵyn-súrginge tikeleı qatysy bar adamdarǵa eskertkish, bıýst ornatý isi áli jalǵasyp keledi. О́mirde bolmaǵan erlik isterge toly ómirbaıandar oıdan qurastyrylyp jatyr. Olar týraly derekter arhıv qujattarynda naqtylanbaǵan nemese múlde joq. Keıbir belsendi toptar azamattarymyzdy keńestik kezeńdegi partııa jáne memleket qaıratkerleriniń ańyzǵa bergisiz ómirbaıandaryna senýge májbúrlep júr», dep qosty Memleket basshysy.