Memleket basshysyna óńirdiń 2022 jylǵy áleýmettik-ekonomıkalyq damý kórsetkishi týraly esep berilip, aldaǵy kezeńge arnalǵan jospary tanystyryldy, dep habarlaıdy Egemen.kz Aqordaǵa silteme jasap.
Kezdesý barysynda oblystyń agroónerkásip keshenin damytý sharalaryna basa nazar aýdaryldy. Atap aıtqanda ıgerilmeı jatqan jerlerdi qaıtaryp, aýyl sharýashylyǵy aınalymyna qosý, ırrıgasııa júıelerin qalpyna keltirý jáne ınnovasııalyq agrotehnologııalardy qoldaný arqyly egin ónimdiligin arttyrý máseleleri talqylandy.
Beıbit Isabaevtyń aıtýynsha, qant óndirisi salasynyń damýy udaıy baqylaýda. Aqsý qant zaýytyn iske qosý jumystary aıaqtalýǵa jaqyn. Bıyl kásiporyn 40 myń tonnaǵa deıin qant quraǵyn óndirýdi josparlap otyr. Jalpy óńirde osy jyly 132 myń tonnaǵa deıin qant óndiriledi.
Bul oblystyń qantqa degen qajettiligin tolyq ótep qana qoımaı, ónimdi basqa óńirlerge de jetkizýge múmkindik beredi. 2026 jylǵa qaraı qant qyzylshasy alqabyn eki ese ulǵaıtý kózdelip otyr. Sonymen qatar Memleket basshysyna turǵyn úı qurylysy, shaǵyn jáne orta kásipkerlikti qoldaý, jol ınfraqurylymynyń, turǵyn úı-kommýnaldyq sharýashylyǵynyń jaı-kúıi, onyń ishinde óńirdiń gazben qamtamasyz etilýi jóninde málimet berildi. Búginde Jetisý oblysyndaǵy 22 eldi mekenge gaz qubyry tartylyp, 288 myń turǵyn kógildir otynǵa qol jetkizdi. Jyl sońyna deıin taǵy 20 eldi meken gazǵa qosylady. Budan bólek, 2025 jylǵa deıin oblysta 23 mektep salý josparlanyp otyr. Sonyń ishinde 10 mektep «Jaıly mektep» ulttyq jobasy aıasynda paıdalanýǵa berilmek.
«Aýyldaǵy densaýlyq saqtaýdy jańǵyrtý» ulttyq jobasy boıynsha 59 medısına nysanyn salý, sondaı-aq jergilikti bıýdjet esebinen 57 blokty-modýldi bólimshelerdi paıdalanýǵa berý kózdelgen. Prezıdentke «Qorǵas – Shyǵys qaqpasy» arnaıy ekonomıkalyq aımaǵynyń damý barysy jóninde baıandaldy. Onyń aýmaǵynda ındýstrııalyq parktiń qurylysyn júrgizý josparlanyp otyr.
Qasym-Jomart Toqaev Beıbit Isabaevqa ınvestısııa tartý úshin týrızm, kólik jáne logıstıka salalarynyń áleýetin barynsha tıimdi paıdalanýdy tapsyrdy. Memleket basshysy óńirde agroónerkásip kesheni men qant óndirý salasyn damytý, sondaı-aq ıgerilmegen aýyl sharýashylyǵy jerlerin memleketke qaıtarý isin jalǵastyrý mańyzdy ekenin aıtty.