Erkeǵalı Rahmadıev atyndaǵy Memlekettik akademııalyq fılarmonııasynyń Sımfonııalyq orkestri, Kameralyq hory, «Qorqyt» dástúrli saz toby, klassıkalyq vokal bólimi men fılarmonııanyń dástúrli ánshileri kórnekti kompozıtor Muqan Tólebaevtyń 110 jyldyǵyna arnalǵan «Muqannyń máńgilik murasy» atty sazdy keshin usyndy.
KSRO halyq ártisi, KSRO Memlekettik syılyǵynyń laýreaty Muqan Tólebaev qazaq mýzyka ónerinde óshpes iz qaldyrdy. Onyń murasy – qazaq kásibı mýzykasynyń bıik shyńy. Kompozıtordyń shyǵarmashylyq qorjynynda túrli janrdaǵy júzden asa shyǵarma bar: operalar, sımfonııalyq orkestrge arnalǵan ývertıýralar men fantazııalar, dramalyq spektaklder men fılmderge arnalǵan mýzykalar, romanstar, ánder, hor jáne fortepıanolyq shyǵarmalar. Bul týyndylar mýzyka tiliniń shynaıylyǵymen, ózindik qoltańbasymen erekshelenedi. Shyǵarmashylyq mol mura qaldyrǵan kompozıtordyń rýhyna taǵzym etý – maestronyń mýzyka salasyndaǵy izbasarlarynyń ǵana emes, ulttyń da úlken boryshy sanalady.
E.Rahmadıev atyndaǵy Memlekettik akademııalyq fılarmonııasy Sımfonııalyq orkestriniń konsertinde «Qazaqstan» sımfonııalyq poemasy, «Meniń Qazaqstanym», «Baqyt valsi», «Tos meni tos», «Kesteli oramal», «Tolǵaý», «Mereke bı», «Toı» sımfonııalyq kartınasy, «Birjan sal» operasynan Saranyń arııasy jáne basqa da týyndylary oryndalady. Kesh solısteri – halyqaralyq baıqaýlardyń laýreattary Shahrızada Tynyshtyq, Qýanysh Bilál, Sáýlejan Taǵzııa, Almat Izbambetov, Áıgerim Amanjolova, Altynbek Arystanbek, Talǵat Allabırınov, Azamat Jyltyrgózov. Keshtiń dırıjeri Sımfonııalyq orkestrdiń kórkemdik jetekshisi Ádil Bestembekov boldy.