Túrkııanyń Konıa qalasynda WKF karateden A serııasyna kiretin halyqaralyq báseke máresine jetti. Osy maýsymdaǵy ekinshi týrnırde óner kórsetken elimizdiń tatamı sheberleri tolaıym tabysqa qol jetkizip, eki altyn medal jeńip aldy.
Sportty damytý dıreksııasynyń málimeti boıynsha, Qazaqstan quramasy sapynan kýmıte baǵdarlamasynda synǵa túsken 55 kılo salmaqtaǵy Bella Samasheva fınalda Bosnııa jáne Gersegovına sportshysy Neıra Shıpovıchti qapy qaldyryp, jarys jeńimpazy atansa, 68 kılodaǵy Laýra Áliqul da Túrkııa tatamıinde qarsylas shaq keltirmeı, altynnan alqa taqty.
О́zge jerlesterimizden Malıka Ábjanova (-50 kg), Ásemgúl Erdáýlet (-55 kg), Venera Jaqsybaeva (-68 kg), Aıdos Muhat (-67 kg), Batyrǵalı Ábilmansur (-75 kg) óz salmaǵynda 5-orynǵa turaqtady. Anadolydaǵy jarysqa el quramasynan jalpy sany 49 sportshy qatysqan bolatyn. Munda eń kóp sportshyny jarys qojaıyny Túrkııa (187 sportshy) qossa, odan keıin Iran (136 sportshy) men Italııa (75 sportshy) tur.
Jalpy, Túrkııadaǵy týrnırde álemniń 76 elinen kelgen 1 100 karateshi sheberlik baıqasty. Serııanyń kelesi týrnırin Rıchmond-Vankýver (Kanada), Larnaka (Kıpr) men Matozınıýsh (Portýgalııa) qalalary qabyldaıdy. Maýsymdaǵy alǵashqy báseke Grekııa astanasynda ótken bolatyn.
Aıta keteıik, A serııasyndaǵy básekelerde eń kóp upaı jınap, óz salmaǵyndaǵy reıtıngte 32 myqtynyń qataryna engen sportshylar joǵary sanattaǵy Premer-lıga saıystaryna joldama alady.