Halyqtyń senimi mańyzdy

Partııa ókilderi ammıak pen ammıak selıtrasyn eksporttaýshy «QazAzot» kásipornynyń ujymymen kezdesti. Aqtaýdaǵy is-shara­ǵa kásiporynnyń 100 qyzmetkeri qatysty. Par­tııa tóraǵasy Aıdarbek Qojanazarov partııa múshe­leriniń kózdegeni – halyq senimi ekenin, maqsat – azamattardyń ómirin jaqsartý úshin elge qyzmet etý ekenin basa aıtty.

«Sońǵy jyldary elimizde saıası kóńil kúı ózgerdi, báriniń qoıatyny bir suraq: munaı men gaz qory taýsylǵan soń, 30-50 jyldan keıin qalaı ómir súremiz? Bizdi de osy másele alańdatady, sondyqtan biz osynda keldik. Árqaısymyzdyń artymyzda jeke tabys tarıhy jatyr. Al bizdiń elimiz jeke maqsattarymyz ben murattarymyzǵa jetýge múmkindik berdi. Endi biz bar bilimimiz ben kúshimizdi Otan ıgiligi úshin jumsaǵymyz keledi! Bizdiń adamgershilik boryshymyz – halyqtyń senimin aqtap, ósip-ónip, tabys taýyp, jetistikke jetýimizge múmkindik bergen elimizge shyn júrekten qyzmet etý», dedi A.Qojanazarov.

Parlament Májilisiniń depýtattyǵyna kandıdat Ekaterına Smolıakova «Respublica» partııasy bilimdi jastardy, bilikti mamandardy, eńbek adamdaryn aldyńǵy qatarǵa qoıatynyn basa aıtty. Dál osy úsh tuǵyrǵa saı partııanyń saılaýaldy baǵdarlamasy ázirlengen.

«Bilimdi jastar – el damýynyń qozǵaýshy kúshi. Damyǵan elderdi alyp qarasaq, ǵylymdy qaryshty damytyp, zerttep jatyr. Al biz áli kúnge deıin áleýmettik máselelerimizdi sheshe almaı kelemiz. Arada 30 jyl ótse de sol suraqtardy qoıyp jatyrmyz. Biz ony kelesi deńgeıge kóterýimiz kerek. Bilimdi arttyrý, ǵylymmen aınalysý kerek. Ýnıversıtetter men kolledj­der kásiporyndarmen tyǵyz baılanysta bolýǵa tıis, oqý baǵdarlamalary únemi qaıta qaralyp, zaman talabyna saı túzetilip otyrýy qajet. Dýaldy oqytýdy da barlyq jerde engizý kerek. Búginde talapkerler jumysshy mamandyqtaryn meńgergisi, aımaqtarǵa barǵysy kelmeıdi, sebebi jalaqy az, áleýmettik paket óz deńgeıinde emes. Osy máselelerdi sheshsek, jastar aýyldarǵa, zaýyttarǵa barady», dedi E.Smolıakova.