Jalpyulttyq sosıal-demokratııalyq partııasy atynan Májilis depýtattyǵyna partııalyq tizim boıynsha kandıdat Ajar Saǵandyqova men birmandattyq aýmaqtyq okrýg boıynsha kandıdat Azamat Haısın «Úgit-nasıhat poıyzy» aıasynda Pavlodar oblysynyń aýdandaryna bardy.
Kandıdattar Pavlodar oblysy Sharbaqty aýdanyna soǵyp, jergilikti saılaýshylarmen kezdesti. Turǵyndar densaýlyq salasyna qatysty problemalardy ortaǵa saldy.
«Bizdegi bitpeıtin jyrǵa aınalǵan salanyń biri – medısına. Dál osy salaǵa kelgende kimniń bolsa da kóńili kúpti. Sýyq tıip aýyrǵan balanyń aýrýhanadan sal bop shyǵatynyna kóz úırendi. О́zine eskertýsiz on eki múshesiniń birinen aıyrylyp jatatyn eldiń qarasy kóbeıdi. Áıteýir, qazir medısınalyq mekemeler men dárigerlerdi sotqa súıreıtin oqıǵa óte kóp. Eń ókinishtisi, árbir jaǵdaıdyń artynda adam taǵdyry tur. Áleýmettik jelilerden eki kúnniń birinde dertine daýa izdep, otandyq medısınadan kóńili qalǵan jazbalardy oqıtyn boldyq. Qoǵam belsendileri men sarapshylar «Bizdegi medısınanyń damýy kemi 30 jylǵa artta qaldy» dep otyr. Jurt tegin emge arqa súıemeıtin bolǵan. Aılap kezek kútkenshe, aýrýyn asqyndyryp alýdan qorqyp, sol kúni qabyldaıtyn aqyly qyzmetke júginedi. Osydan keıin medısınadan mán ketti deýge ábden negiz bar. Tipti, keıbiri kórshi memleketterge baryp qaralýǵa májbúr.
Onyń ústine Qazaqstanda medısına mamandarynyń kásibı daıyndyǵy kóńil kónshitpeıdi. Ásirese, aýyldyq jerlerde medısınalyq qyzmettiń sapasy tómen. Búrkegen jerden búrge shyǵaryn eskersek, aldymen osy olqylyqtyń ornyn toltyrý kerek. Densaýlyq saqtaý salasyna qatysty kúnde bir jıyn ótip, jıi-jıi talqylaýǵa ushyrasa da, bul salanyń máselesi azaımaı otyr. Kezinde densaýlyq saqtaý salasy mamandary sheteldiń joǵary oqý oryndarymen birlese otyryp, elimizdiń medısınalyq bilimin jańǵyrtý sharalary qolǵa alynǵanyn aıtqan edi. Fınlıandııanyń tájirıbesi negizinde bakalavrıat boıynsha medbıkelik bilimdi jańǵyrtý sharalary da qolǵa alynǵan. Alaıda onda dáris alyp jatqannyń barlyǵy birdeı aýylǵa barmaıdy. Sebebi, olardy mindetti túrde aýyldy jerlerge jiberý qarastyrylmaǵan. Osy tusta aýylǵa dáriger tartý úshin osy baǵytta bilim alýshylarmen kelisimshartqa otyrý sharalaryn da qarastyryp kórý kerek sııaqty», dedi A.Saǵandyqova.