Nazarbayev University-de jaratylystaný, áleýmettik jáne gýmanıtarlyq ǵylymdar mektebiniń professory Gúlnár Omarbekovanyń «Qazirgi qazaq maqal-mátelderin zertteý: sıfrlyq, tanymdyq, ádebı jáne ekologııalyq baǵyttar» atty kitabynyń tanystyrylymy ótti. Zertteý jınaǵy Pıter Lang (Nıý-Iork) baspasynan byltyr jaryq kórdi.
Mazmundy is-sharaǵa Nazarbayev University-diń akademııalyq ister jónindegi vıse-provosty Loretta O’Donnell jáne kitaphana bas sarapshysy Petr Mıhaılovıch Lapo qatysty. Olar atalǵan eńbekti qazaq maqal-mátelderiniń qurylymy, semantıkasy, kognıtıvti, lıngvomádenı erekshelikteri, pragmatıkasy jáne BAQ betterinde transformasııalanýy men sıfrlanýy sııaqty ózekti tustaryn tereńdete zerttegen ǵylymı jumys dep baǵalady.
Sondaı-aq tanystyrylymda sóz alǵan basqa da ǵalymdar qazaq maqal-mátelderiniń ulttyq tabıǵatyn sıpattaıtyn jınaq otandyq jáne Batys ádistemesin biriktirip, qazaq ǵalymynyń biregeı zertteýin álemge tanytatyn alǵashqy eńbek ekenin jetkizdi. Atalǵan kitap bıyl Scopus derekqoryna engen.
Sonymen qatar is-shara barysynda án aıtylyp, kúı shertildi. Ásirese Janar Ábdiǵaparova shyrqaǵan halyq ánderi kelgen qonaqtardy jyly áserge bóledi.