Qazaqstan Halyq partııasynan Májilis depýtattyǵyna kandıdat Naılıa Appasova men máslıhat depýtattyǵyna kandıdat Azamat Ábdirahmanov respýblıkalyq transplantasııa jáne joǵary tehnologııalyq medısınalyq qyzmetterdi úılestirý ortalyǵynyń ujymymen kezdesti.
Spıkerler dárigerlerdi partııanyń saılaýaldy baǵdarlamasymen tanystyrdy. Onda partııa ókilderi QHP dárigerlerdiń mártebesin kóterýdi kózdeıtinin, sonymen qatar qoljetimdi jáne tegin dári-dármekti halyqqa úlestirý qajettigin atap ótti. Sondaı-aq olar medısına qyzmetkerleri laıyqty jalaqy alýǵa tıis ekenin tilge tıek etti. Partııa ókilderi ujymǵa 19 naýryzda ótetin saılaýdyń mańyzdylyǵyn aıtyp, saılaý quqyqtaryn paıdalanýǵa shaqyrdy.
О́z kezeginde dárigerler elimizde 3 myńnan astam adam transplantasııalaý kezeginde turǵanyn jetkizdi. Munyń kóbi 35-45 jas aralyǵyndaǵy naýqastar ekeni aıtyldy. «Qazaqstanda aǵza donorlyǵyn damytýdyń negizgi problemalary jeterlik. Eń bastysy, bul baǵytta zańnamalyq ózgerister men aqparattyq jumystar qajet», dedi olar.
Al Parlament Májilisi depýtattyǵyna kandıdat Gaýhar Tanasheva Soltústik Qazaqstan oblysynyń Qyzyljar aýdanyna qarasty Báıterek aýylynyń turǵyndarymen kezdesti.
«Biz áıelder 58 jasta zeınetke shyǵý kerek degen qozǵalysty qoldap, mıtıngilerge qatystyq. Nátıjesinde, áıelderdiń zeınetke shyǵýyn 61 jastan ulǵaıtpaý jóninde 5 jyldyq moratorıı jarııalandy. Biz áıelderdiń quqyǵyn Parlamentte qorǵaımyz», dedi Gaýhar Tanasheva.
Halyq partııasy aýyr, zııandy nemese qaýipti jumystarda isteıtin qyzmetkerlerdi 50-55 jastan zeınetke shyǵarýdy talap etedi.
Kezdesýde densaýlyq salasyndaǵy ózekti máseleler kóterildi. Elimizdegi jumyssyzdyqqa baılanysty kóptegen azamat MÁMS tóleýge qaýqarsyz. Osynyń saldarynan kóp adamdar medısınalyq kómekti ala almaı otyr. Sondaı-aq memlekettik saqtandyrý kópbalaly, erekshe qamqorlyqty qajet etetin balasy bar jáne tolyq emes otbasyndaǵy analarǵa asa qajet.
Halyq partııasy aýyldyq aımaqtardy damytý baǵdarlamasy sheńberinde aýyldyq jerlerde kópbalaly otbasylar úshin tegin turǵyn úı salýdyń memlekettik baǵdarlamasyn ázirleýdi usynyp otyr.