Eńse tikteı bastaǵan enshiles bankter

«Bul elimizdiń qarjy nary­ǵyn­­da bolyp otyrǵan tarıhı sát. Bereke Bank-ti sanksııadan shy­ǵarý úshin aksıoner, Ulttyq bank, retteýshi organ men Ishki ister mınıstrligi jáne elimizdiń AQSh-taǵy Elshiligi úlken qoldaý kórsetti. Bank kezikken qıyn­dyqtarǵa tótep berip, óz klıent­te­ri men seriktesteriniń aldynda belgilengen mindettemelerin oryndap, elimizdegi úzdik bank­ter­diń qataryna engen edi. Bul qarjy ınstıtýty qyz­met­ker­le­riniń kásibı biliktiligi men senim­diliginiń taǵy bir dáleli», deıdi banktiń basqarma tóraǵasy Andreı Tımchenko.

Bank sanksııa kezinde de qyz­me­tin toqtatpaýǵa tyrysty. Shek­teý­ler kóbinese valıýtalyq operasııalarmen, onyń ishinde dollar jáne eýromen jasalatyn operasııalarǵa, korrespondenttik qatynastarǵa jáne sheteldik servısterge baılanysty boldy.

Jyldyń basynda bank prý­den­sıaldyq normatıvterge sáı­kes, kapıtaldyń jetkiliktilik koeffısıentin teńestire otyryp, túgelge jýyq negizgi kórset­kish­terin jaqsartqan. Basqarma tóraǵasy keleshekte bank qyz­me­tiniń odan ári damýyna jáne ny­ǵaıýyna barynsha kúsh sala­tyn­dy­ǵyn aıtty.

Búginde Bereke Bank shottardan aqsha sheshý, olardy tolyqtyrý operasııalarynyń spektrin, bólshek klıentter men korporatıvtik bıznestiń barlyq segmenti úshin qarjy ónimderin, servısterdi, taýarlar men qyzmet aqysyn tóleý opera­sııalaryn, ulttyq jáne shetel valıýtasyndaǵy aqsha aýda­rym­daryn, bankomattar arqyly júrgiziletin operasııalardy usynyp otyr. Qyz­met­ter jeke tulǵalar úshin «B-Bank» jáne zańdy tulǵalarǵa ar­nal­ǵan «B-Business» mobıldi qo­sym­sha­larynda qoljetimdi. Qazir bank­tiń el aýmaǵynda 18 fılıaly men 111 qurylymdyq bólimshesi bar.

Jalpy, Qazaqstandaǵy úsh bir­deı reseılik enshiles bank san­ksııa tuzaǵyna ilindi. Olar – «Sberbank», «Alfa-bank» jáne VTB (Qazaqstan) Bank. «Alfa-bankti» áýeli «Bank Sentr­Kredıt» satyp alyp, ony Eco Center Bank dep atady. Keıin ony ózine birjola qosyp aldy. Al VTB-nyń Qazaqstandaǵy bankin Máskeýdegi negizgi VTB qosymsha ka­pı­taldandyrdy. Qazir VTB Qa­zaq­stan aýmaǵynda óz jumysyn jalǵastyryp jatyr. Aktıvter kólemi boıynsha Qazaqstandaǵy ekinshi qarjy ınstıtýty bolyp kelgen «Sberbanktiń» jumysyna shekteý qoıylǵannan keıin ony «Báıterek» holdıngi satyp alǵan edi. Ulttyq holdıng banktiń ataýyn ózgertip, basshylyq quramyn jańalap, ony aqyry sanksııa tiziminen shyǵardy. Aldyn ala aqparattar boıynsha jaqyn arada «Báıterek» Bereke Bank-ti satylymǵa shyǵarmaq. Qarjy ınstıtýty naryq talaptaryna sáıkes, memleket qaraýynan tys damýǵa tıis dep sanaıdy holdıng basshylyǵy.