Jaqynda Ońtústik Qazaqstan oblysy ákimdiginiń uıymdastyrýymen bir top kásipkerler Malaızııa, Indonezııa jáne Ońtústik Koreıa elderine arnaıy issaparmen baryp qaıtty. Osy sapardan alǵan áserleri men atqarylǵan jumystar jóninde bólisken delegasııanyń basshysy, oblys ákiminiń orynbasary Saparbek Tuıaqbaev bylaı dedi:
– О́tken jyly osyndaı issapar Germanııa, Shveısarııa, Italııa jáne Reseıdiń úsh oblysyna jasalǵan edi. Bıyl bul jumys Malaızııa, Indonezııa jáne Ońtústik Koreıada jalǵasty. Oblystan 15 adam bardyq. Olardyń arasynda onshaqty iri kásiporyn ıeleri, óńirlik kásipkerler palatasynyń jáne ákimdiktiń qyzmetkerleri, «Shymkent-ınnovasııa» JShS-niń basshylyǵy boldy. Bizdiń bul jolǵy issaparymyz óte sátti ótti.
Delegasııa basshysynyń aıtýynsha, ár memlekette uıymdastyrylǵan bıznes-forýmǵa 160-tan astam sheteldik kásipkerler qatysqan. Olardy otandyq bıznes ókilderi óz jobalarymen tanystyrǵan, oblystyń ınvestısııalyq múmkindikterin ashyp, saralap berýge keń múmkindik berilgen. Aldyn ala arnaıy baǵdarlama jasalyp, onyń eń ózekti máseleleri aıqyndalǵan. Olar – aýyl sharýashylyǵy jáne tamaq ónerkásibi, toqyma ónerkásibi, farmasevtıka, aýylsharýashylyq tehnıkasy men agrohımııa, týrızm, balamaly qýat kózderi men qurylys materıaldary. Búginde Qazaqstanǵa ınvestorlar tartý onsha qıynǵa soqpaıdy. О́ıtkeni, Keden odaǵy qurylǵaly saýda naryǵy 17 mln. emes, 170 mln. turǵynǵa esepteleri anyq. Ekinshiden, kedergisiz logıstıka. Úsh elge qatysty saýda-sattyq qyzmetin kedergisiz emin-erkin paıdalanýǵa bolatyny da olardy qyzyqtyryp otyrǵan kórinedi. Sheteldik ınvestorlarǵa budan basqa kóptegen jeńildikter bar ekeni aıtylǵan. Shyǵys Azııa kásipkerlerin Qazaqstanda týrızmdi damytýdyń bolashaǵy da qyzyqtyryp otyrǵan kórinedi. Qazirgi ýaqytta oblysta týrızm klasteriniń negizgi baǵyttary aıqyndalǵan. Onyń biri – Túrkistan-Otyrar baǵytyndaǵy mádenı-tarıhı týrızm bolsa, ekinshisi – Saryaǵashtaǵy emdik týrızm. Úshinshisi – Tóle bı, Túlkibas aýdandaryndaǵy ekotýrızm. Qazirdiń ózinde munda birneshe týrıstik bazalar ashyldy. Taıaý kúnderde «Qasqasý» taý shańǵysy kesheniniń qurylysy bastalmaq. Shyǵys Azııa memleketterine issapar barysynda birqatar mańyzdy kelisimsharttarǵa qol jetkizilgen. Onyń ishinde Ońtústik Qazaqstan oblysynda ońtústikkoreıalyq «Hyundai Materials» korporasııasymen birlesip, «Hıýndaı» markaly avtokólikterdi qurastyrý, «Daedong Industrial» kompanııasymen birge aýyl sharýashylyǵyna qajetti tehnıka jasaý jáne «Seolim Trading» kompanııasynyń kómegimen «DEÝ» avtokólikteriniń qosalqy bólshekterin shyǵarý jáne malaızııalyq «Proton» kompanııasymen birlesken kásiporyn ashý jóninde ortaq kelisimge kelgen. Basqa da iri jobalar bar.
– Issapar barysynda meniń bir baıqaǵanym, Malaızııada tamaq ónimderin daıyndaý jaqsy damyǵan eken. Onyń ishinde balyq ónimderi erekshe orynda. Bizde negizinen qaramal men jylqy ǵoı. Meniń ózim de memlekettik «Sybaǵa» baǵdarlamasy arqyly nesıe alyp, mal bordaqylaýmen aınalysyp kelemin. Alǵashynda 200 bas iri qarany semirtýden bastaǵanbyz. Qazir kútimimde 1,5 myń bas qara mal bar. Meni Malaızııadaǵy «Halal» tamaq óndirisi erekshe qyzyqtyrdy. Olarmen kelisimge de keldik. Qazirgi kezde Qazaqstanda 5-6 iri et kombınatyn salý josparlansa, sonyń bireýiniń qurylysyn men bastap ketken edim. Onyń ishinde jabdyqtardy Eýropadan jáne Túrkııadan alatyn boldyq. Biraq malaılardyń aıtqany: «Sizder jabdyqtardy ornatýǵa asyqpańyzdar. Halal et shyǵarý úshin bizdiń óz shartymyz bar». Qudaı qalasa, sol sharttaryn saqtaıtyn bolamyz. Meniń baıqaýymsha, halal ónimderin shyǵarý ońaı tirlik emes. Tipti, malǵa beriletin azyqtyń quramyna deıin baqylaýǵa alynady eken, dedi delegasııa múshesi, «Qaıyp ata» JShS-niń bas dırektory Jaras Ertaev.
«Egemen-aqparat».
Ońtústik Qazaqstan oblysy.