Ortalyq saılaý komıssııa tóraǵasynyń orynbasary Konstantın Petrov búgin ótip jatqan saılaýǵa qatysty aqparatpen bólisti, dep habarlaıdy Egemen.kz.
Qazirgi ýaqytta el óńirlerindegi 8 272 ýchaskede daýys berý júrip jatyr.
«Ortalyq saılaý komısssııasy oblystardyń, Astana, Almaty, Shymkent qalalarynyń komıssııalary usynǵan aqparatqa sáıkes, 07.00-degi jaǵdaı boıynsha óńirlerde 8 272 ýchaskede daýys berýdiń bastalǵanyn habarlaıdy. Sondaı-aq Qazaqstan Respýblıkasynyń 12 shet memlekettegi 13 ýchaskesinde daýys berý bastaldy. 92 ýchaskede aýmaqtyq komıssııalardyń Konstıtýsııalyq zań aıasynda qabyldanǵan sheshimderine sáıkes, daýys berý tańǵy saǵat 06.00-de bastaldy. 5 óńirdiń, Aqtóbe, Atyraý, Batys Qazaqstan, Mańǵystaý, Qyzylorda oblystarynyń 1 887 ýchaskesinde daýys berý astana ýaqytymen saǵat 08.00-de bastalady. Barlyǵy 10 223 ýchaskesi, onyń ishinde 62 shet memlekettegi elimizdiń 77 ýchaskesi bar», dedi Konstantın Petrov.
Spıkerdiń aıtýynsha, saılaýshylar tizimine 12 mln 32 550 adam engen. Ýchaskelik komıssııalar azamattardyń jazbasha ótinishteri boıynsha daýys berý quqyǵyn beretin 12 765 kýálik berdi.