Batys Qazaqstan oblysynda 504 saılaý ýchaskesi barlyq talapqa saı tańǵy saǵat 7:00-de óz jumysyn bastap ketken edi. Qazir daýys berý qalypty júrip jatyr, dep habarlaıdy Egemen.kz.
Oblystaǵy aýmaqtyq saılaý komıssııasynyń tóraǵasy Ǵaısa Qapaqovtyń aıtýynsha, ákimshilik-aýmaqtyq birlikterdegi ózgeristerge oraı jańadan 4 saılaý ýchaskesi qurylsa, burynǵy 5 ýchaske jabylyp qalǵan. Saılaýǵa daıyndyq kezeńinde Oral qalasy men birneshe aýdanda bos turǵan 116 vakansııaǵa jańa qyzmetker alynypty. Jalpy Batys Qazaqstan oblysynda 689 saılaý komıssııasy bar, olardyń 171-i – okrýgtik komıssııa, 14-i – aýmaqtyq saılaý komıssııasy. Bul komıssııalar quramynda 4101 adam bar.
Qalada turǵylyqty mekenjaıy boıynsha esh jerde tirkelmegen azamattar úshin 5 saılaý ýchaskesinde daýys berý múmkindigi qarastyrylǵan. Shahar irgesindegi aýyldar men saıajaılardaǵy saılaýshylar qoǵamdyq kólikpen tegin júr. Sonymen qatar múgedekterge ınvataksı qyzmeti uıymdastyrylǵan.