Saılaý ýchaskesine baryp, óz tańdaýlaryn jasaǵan batysqazaqstandyqtar arasynda qazaqy ulttyq kıim kıgen jandar kóp, dep jazady Egemen.kz.
«Búgin biz úshin mereke. Tańerteń turyp, eń ádemi kıimderimdi kıip, Oral qalasynyń medkolledj aımaǵyndaǵy №436 saılaý ýchastogine kelip tańdaýymdy jasadym. Zeınet demalysynda júrsem de elimizdiń qoǵamdyq ómirinen tys qalǵym kelmeıdi. Bıyl Jaıyq ózeni kóterilip, bizdiń Jaqsy aýyl shaǵynaýdanyndaǵy kólge sý quıyp jatyr. 2018 jyldan beri sý bolmaı, keýip qalǵan jer edi. Osy kóldiń jaǵdaıyn aıtyp, neshe jyldan beri shyr-pyr bolyp júrgenimdi aınalam biledi ǵoı. Bıyl kólde aqqý-qaz júzip, ol jaqtan jaz boıy samal jel esetinin oılasam, kóńilim kóterile túsedi. Búgingi saılaý da qazaq qoǵamyna tyń serpilis, erekshe lep berse eken», deıdi 71 jastaǵy aqsaqal Qaıreden Jaqsyǵulov.
Qaıreden aǵa saılaý ýchastoginde jaıylǵan shaǵyn dastarhan basyna jaıǵasyp, baýyrsaqtan aýyz tıip, komıssııa múshelerine aq batasyn berip ketti.
Oral qalasyndaǵy №407 saılaý ýchaskesinde belgili ónerpaz Arman Bıǵalıev búkil otbasymen ulttyq kıim kıip daýys bergen.
«Bizdiń basty baılyǵymyz – beıbitshilik, eldiń amandyǵy. Jerlesterimdi uıymshyldyqpen saılaýǵa qatysýǵa shaqyramyn. О́z tańdaýymyzdy jasaıyq. Erteńgi kúnimiz ár otbasyna baq pen bereke syılasyn», deıdi ánshi.
Oral qalasyndaǵy osy úrdis Batys Qazaqstan oblysynyń aýdandarynda da jalǵasyn tapqan. Al Syrym aýdany, Josaly aýyldyq okrýginiń ortalyǵy Qońyr aýylyndaǵy №308 saılaý ýchaskesinde tipti qyzyq oqıǵa boldy. Saılaý komıssııasy ulystyń uly kúni qarsańynda ótip jatqan saıası sharaǵa eń birinshi kelgen saılaýshyǵa shapan jabamyz dep uıǵarǵan eken. Keremet syılyq aýyl sharýashylyǵy salasynyń ardageri, aýyl aqsaqaly Baqtyǵalı Ahmedııarovqa buıyrdy.