Belgııanyń Lommel qalasynda taekvondodan halyqaralyq «Belgian Open G2» týrnıri aıaqtaldy. Bul básekede Qazaqstan ulttyq quramasynyń sportshylary 2 altyn, 3 qola medal jeńip aldy.
Atap aıtqanda, otandastarymyzdan Rıta Bakısheva (46 kg) men Rýslan Japarov (+87 kg) óz salmaǵynda qarsylas shaq keltirmeı, altynnan alqa taqsa, Nurbek Gazez (63 kg), Maqsat Orynbasar (68 kg), Aıdana Qumartaeva (46 kg) qola júldegerler qatarynan kórindi.
Sportty damytý dıreksııasynyń málimeti boıynsha, endi Qazaqstan erler quramasy Parıjde Fransııa quramasymen birlesken oqý-jattyǵý jıynyn ótkizedi. Al áıelder quramasy 20-27 naýryz aralyǵynda Nıýrnbergte Germanııa quramasymen birge sheberligin shyńdaıdy. Bul jıynnan keıin jerlesterimiz 1-4 sáýir aralyǵynda Aýstrııanyń Insbýrg qalasyndaǵy halyqaralyq týrnırde baq synamaq.