Ulystyń uly kúni – áz Naýryz meıramy qarsańynda muhıttyń arǵy betinen súıinshi habar jetti. Tennısten elimizdiń birinshi, álemniń jetinshi raketkasy, «Úlken dýlyǵa» sanatyndaǵy «Ýımbldon» týrnıriniń jeńimpazy Elena Rybakına Qazaqstan tennısshileri arasynda tuńǵysh ret «BNP Paribas Open» (WTA 1000) týrnırinde top jardy. Ol fınalda Belarýs maqtanyshy, álemniń ekinshi raketkasy Arına Sobolenkony tize búktirdi.
AQSh-tyń Indıan-Ýells qalasynda uıymdastyrylǵan bul doda – tennısshilerdiń «Úlken dýlyǵa» sanatyndaǵy tórt iri jarysynan keıingi orynda turatyn shoqtyǵy bıik báseke. 1974 jyly tusaýy kesilgen jarysta búginge deıin nebári 17 memlekettiń ǵana ókili úzdik shyqqan eken. Endi bul qatarǵa Qazaqstan tennısshisi Elena Rybakına da qosyldy.
AQSh-taǵy tennısshiler saıysynyń fınalyn tek Qazaqstannyń ǵana emes, búkil álemniń jankúıerleri taǵatsyzdana kútti. О́ıtkeni osydan birer aı buryn dál osy eki tennısshi Aýstralııa ashyq chempıonatynyń fınalynda kezdesip, sol saıysta Arınanyń mereıi ústem bolǵan edi. Al bul kezdesýde kópshilikti Elena Rybakına Melbýrndegi esesin qaıtara ala ma degen suraq qyzyqtyrdy.
Tartysty básekeniń birinshi partııasynda eki tennısshi de asa saqtyqpen oınap, qatelik jasamaýǵa tyrysty. Besinshi geımge kelgende birinshi bolyp Rybakınanyń júıkesi syr berdi. Dopty ózi oıynǵa qosqan geımde qarsylasyna breık jasaýǵa múmkindik berip qoıdy – 3:2. Biraq kóp uzamaı Elenanyń ózi de qaıyra breık jasap, tez arada tarazy basyn teńestirip úlgerdi – 4:4. Keıingi tórt geımde eki tennısshi de saýatty oıynymen kózge túsip, bir-birin alǵa jibergen joq – 6:6. Sóıtip birinshi partııanyń jeńimpazy taı-breıkte anyqtaldy. Bul kezeńde Elena Rybakınanyń baǵy jandy – 7:6 (13:11). Birinshi partııada tennısshiler bir saǵat 20 mınýt oınady.
Ekinshi setti otandasymyz «á» degennen breıkpen bastady. Tablodaǵy kórsetkish 4:2 bolyp turǵan jetinshi sette Elena taǵy da bir breık jasap, 5:2 esebimen alǵa uzap ketti. Segizinshi geımde Rybakınanyń oıyndy aıaqtaıtyn tamasha múmkindigi boldy. Biraq dopty oıynǵa qosqan sette birde-bir upaı ala almaı, Sobolenkoǵa 40:0 esebimen jol berip qoıdy – 5:3. Degenmen, otandasymyz kelesi múmkindigin 100 paıyz paıdalanyp, ekinshi setti 6:4 esebimen óz paıdasyna aıaqtady. Eki saǵattan astam ýaqytqa sozylǵan báseke barysynda Elena 7 eıs jasap, 10 breık-poınttyń úsheýin paıdalandy.
Osylaısha, alǵash ret WTA 1000 jarysynyń jeńimpazy atanǵan E.Rybakına A.Sobolenkodan Aýstralııa ashyq chempıonatynyń fınalynda ketken esesin qaıtardy. Sondaı-aq Elena Rybakına sporttyq jolynda alǵash ret álemdik reıtıngte jetinshi orynǵa kóterildi. Bul – onyń jeke rekordy.
Elena Rybakınanyń «BNP Paribas Open» týrnırindegi júrip ótken jolyna zer salar bolsaq, jarysty ekinshi aınalymnan bastaǵan ol alǵashqy kezdesýin 2020 jylǵy Aýstralııa ashyq chempıonatynyń jeńimpazy, álemdik reıtıngte 170-orynda turǵan amerıkalyq Sofıa Kenındi (7:6, 7:6), úshinshi kezeńde álemniń 22-raketkasy ıspanııalyq Paýla Badosany (6:3, 7:5), tórtinshi aınalymda dúnıejúzilik reıtıngte 66-satyǵa jaıǵasqan reseılik Varvara Grachevany (6:3, 6:0) jeńip, shırek fınalǵa joldama aldy. Al ¼ fınalda Karolına Mýhovany eki sette 7:6, 6:4 esebimen jarys jolynan yǵystyrsa, jartylaı fınalda álemniń 1-raketkasy polshalyq Iga Shventekten aılasyn asyrdy – 6:2, 6:2.
«BNP Paribas Open» týrnırinde top jarǵan Elena Rybakına 1 271 230 AQSh dollary (574 550 449 mln teńge) kólemindegi qarjylaı syıaqy men 1 000 reıtıngtik upaıǵa ıe boldy. Al týrnırdiń erler arasyndaǵy básekesinde 19 jastaǵy ıspanııalyq Karlos Alkaras jeńis tuǵyryna kóterildi. Ol fınalda reseılik Danııl Medvedevti eki sette 6:3, 6:2 esebimen tize búktirdi.