Keıingi jyldary respýblıkalyq saıystarda júldeli oryndar ıelenip, halyqaralyq baıqaýlarda top jaryp júrgen «Shashý» otbasylyq ansambli bıylǵy jazda birneshe memleketke saparǵa shyǵýdy josparlap otyr. Bir otbasynda tárbıelenip jatqan 21 balanyń talantyn ushtap, úlken ómirge baýlyp júrgen – ata-anasy О́mirhan Jetesuly men Amangúl Eshpanqyzy. О́nerli ata-ananyń ár balasy da ónerli. Balalarynyń biri terme aıtady, ekinshisi ánshi, jetigen men sybyzǵyda oınasa, basqalary qobyz ben dombyra tartady. Er balalary, ásirese, qazaqtyń jyr-dastandaryna qumar.
2009 jyldan beri erli-zaıyptylar 18 ata-anasyz sábıdi balalar úıinen patronattyq tárbıege alǵan. On tórt jyldan beri taǵdyrdyń túrli qıyndyǵyna tap bolǵan balalardy baýyrlaryna basyp qana qoımaı, olarǵa jaqsy bilim men tárbıe berip keledi. Búginde eresekterin uıadan ushyra bastady. Eń úlken qyzy Aıgúl ótken jyly turmysqa shyǵyp, jaqynda náresteli boldy. Byltyr shama-sharqynsha toıyn ótkizip, jasaýyn berip uzatty. Qazir О́mirhan men Amangúl quda-qudaǵılarymen jaqsy aralasyp turady. Sondaı-aq osy shańyraqtyń toǵyz eresegi Aqtóbedegi Ahmet Jubanov atyndaǵy mýzykalyq kolledjde oqyp jatyr.
Jetesuly áýletiniń otbasylyq balalar úıi 2009 jyly ashyldy. Sol jyly elimizde otbasylyq úlgidegi balalar úıleri qurylǵan bolatyn. Amangúl mýzyka páni muǵalimi, sol ýaqytta mereke kezinde shyǵarmashylyq uıymdarmen birlese konsert ótkizedi. Mereke qarsańynda «Úmit» sábıler úıine merekelik is-shara ótkizýge barǵanda, bes jastaǵy sábı Almagúl jylap jabysyp, qolynan túspeı qoıǵan. Shara aıaqtalyp ánshiler keter kezde álgi sábı Almagúldiń etegine jabysyp, tárbıeshige barmaıdy. Úıge kelgen soń da álgi sábıdiń jylaǵan úni qulaǵynan ketpeıdi. Túnimen uıyqtaı almaǵan soń, erteńine balalar úıine qaıta barady. Qoly bosaǵanda osy jerge jıi kelip turatyn boldy.
Ata-anasy joq sábıler «Úmit» balalar úıinde bes jasqa deıin tárbıelenip, mektep jasyna jetkende basqa jaqqa aýystyrylady. Aqyry Almagúl otaǵasymen, úsh balasymen keńese otyryp, osy sábıdi asyrap alýǵa sheshim qabyldaıdy. Biraq bala asyrap alý – ońaı sharýa emes. Amangúlge jabysqan sábı jetimder úıine ýaqytsha ornalastyrylǵan, týǵan anasy bar eken. Amangúl kóp júgiristen soń, sábıdi úıine ákeldi. Osydan keıin taǵy birneshe sábıdi patronattyq tárbıege aldy. Bir balany alyp keteıin dep jatqanda, sábıler úıinde qalyp bara jatqan birge týǵanyn qaldyrǵysy kelmedi. Jetesovter áýletine on segiz bala osyndaı jolmen keldi. Sol kezde otaǵasy О́mirhanǵa shaǵyn balalar úıin ashý týraly usynys túsken. «Biraq men oǵan qarsy boldym. О́ıtkeni bólip-jarmaı baǵyp-qaǵyp otyrǵan balamyzdy basqa bireýdiń asyrap alyp ketkenin qalamadym», deıdi О́mirhan Jetesov.
О́mirhan men Amangúl ata-anasyz qalýdyń qandaı ekendigin óte jaqsy biledi. Ekeýi de jastaıynan jetim ósken. Olar alǵash shańyraq kótergende jyly sózben demep, qınalǵan kezde qoldap jiberetin ata-ananyń kómegine talaı zárý bolǵan. Almagúl qyzdardyń tárbıesine óte qatty qaraıdy. Kúndelikti keshkilik ákesi er balalarmen, anasy qyz balalarmen keńes ótkizedi.
Bul úıde ulttyq tárbıeniń ıisi ańqyp tur. Balalardyń bos ýaqyty joq. Qyzdary da, er balalary da úı sharýasyna pysyq. Úlgermeı jatsa, bir-birine kómektesedi. Balalar sabaqtan kelgen soń as iship, úı sharýasyna qolǵabys jasaıdy. Tústen keıin qosymsha dáristerge, sporttyq seksııalarǵa barady. Kóbinese balalar bos ýaqyttarynda kezekti merekelik konsertke daıyndalady.
О́nerli uldarynyń eresegi Temirhan Jetesov dombyrada sheber oınap qana qoımaı, «Edige» dastanyn, Ábýbákir Kerderiniń termelerin aıtýǵa mashyqtanǵan. Ata-anasy barlyǵyna da demeýshiler kómegimen mýzykalyq aspaptar alyp berip, merekelik kostıýmder tiktirdi.
«Bala – Allanyń amanaty. Ata-anasy joq sábıdi baýyryńa bastyń ba, kim ne dese, o desin, shyn kóńilmen súı, tárbıesine muqııat qara. Basynda úrkektep kelgen sábı ata-ana meıirimin kórgennen keıin seni shyn kóńilmen jaqsy kórip ketedi. Tek ony aldaýshy bolma, sol kezde bar ishki syryn aqtarady, qınalǵanda, jany jabyrqaǵanda senimen keńesedi. О́zińnen týǵan bala men asyrap alǵan balańdy bólip-jarýǵa bolmaıdy. Bastapqyda óz balańa da osyny uǵyndyrasyń», deıdi Amangúl. Qazir balalardyń úlkeni 25 jastan assa, kishkentaılary 9-10 jasta. Otbasyndaǵy bes balanyń ulty orys.
Bir áke-shesheden órgen eki-úsh balanyń basyn qosý qıynǵa túsken myna zamanda jıyrma bir balaǵa bir úlgide tárbıe berý ońaı emes. Almagúl kóp balany asyrap alǵanda qıyndyq bolǵanyn jasyrmaıdy. Alaıda erli-zaıyptynyń kózqarasy men ustanymy birdeı bolǵanda alynbaıtyn qamal joq. 21 balany syıǵyzyp, olarǵa meıirim men mahabbat berip, ónerge baýlyp, árqaısysynyń tulǵa bolyp qalyptasýyna úles qosyp júrgen Jetesovter ár balanyń orny bólek ekenin aıtady.
«Balalardy arnaıy mýzykalyq mektepterde oqytýdy maqsat etkenimiz ras. О́ıtkeni balalar bir mamandyqqa ıe bolyp, erjetkende ózderin ózderi asyraı alsa, ekinshi jaǵynan otbasylyq ansambl arqyly tabys tabýdy da oılastyrdyq. Sebebi erjetken saıyn balalardyń qajettiligi kóbeıe beredi ǵoı. Olarǵa jaqsy bilim berý – bizdiń paryz. Uıadan ushyrǵanda olar óz ózderine senimdi bolýy kerek. Otbasylyq ansamblimiz osy oıymen quryldy. Men armanymyz oryndalǵanyna qýanyshtymyn», deıdi Amangúl Eshpanova.
«Eresek aǵa-apaılary kishkentaılaryna úlgi. 21 balam aldymnan júgirip shyqqanda, ózimdi álemdegi eń baqytty jan sezinemin», dep qýanyshyn jasyrmady kópbalaly áke.
Aqtóbe oblysy