Jastar úni jarqyn shyqty

Saıası naýqannyń qorytyn­dysyna oraı ótken jıynǵa belsendi jýrnalıster Erqanat Kópjasaruly, Aqbópe Táńirbergen, Nursultan Qurman qatysty. Olar qoǵamda pikirin ashyq bildirip júrgen ár salanyń belsendi jastaryna úgit-nasıhat kezinde aqparattyq qoldaý kórsetkenin jetkizip, blog jumysynyń statıstıkasyn jarııa etti.

– Keshe biz de kóppen birge istelgen jumystyń nátıjesi bola ma dep alańdap, taǵatsyzdana saılaý qorytyndysyn kúttik. Biz eshqandaı uıym nemese saıası qozǵalys emespiz. «Jastar úni» ótinish bildirgen jas kandıdattardyń usynylǵan partııalaryna qaramaı-aq, barlyǵyna jappaı qoldaý kórsetti. Alaıda biz ózimiz úshin partııalyq tizimderde jas kandıdattardyń usynylýy boıynsha statıstıka jasadyq. Mysaly, Jalpyhalyqtyq sosıal-demokratııalyq partııa tizimindegi 19 adamnyń ishinde 1 jas kandıdat bolsa, «Aq joldan» túsken 54 úmitkerdiń 6-ýy jas. Al «Baıtaqtaǵy» 18 kandıdattyń ishinen 1-i jas úmitker. Sondaı-aq «Respublica»-dan 25 adamnyń 5-eýi, «Amanat»-tyń 90-nan 17-si, «Halyq partııasynyń» 52-den 3-eýi, «Aýyl» partııasynyń 25-ten 9-y ótti. Baǵdarlaǵanymyzdaı, kórsetkishter jaman emes. Endi biz bul jas úmitkerlerdi Exit-rull-dyń sońǵy nátıjelerine sáıkes, tizimge engizilýi boıynsha baqylaımyz, – dedi jýrnalıst Aqbópe Táńirbergen.

Jıynda «Jastar úni» blogynyń bastamashyl ókilderi bir aı boıy podkasttar, blogtar, posttar jarııa­lap, jas kandıdattardy jan-jaqty qoldaý bildirgenin jetkizdi. Buǵan qosa olar blog jumysy ári qaraı da jalǵasatynyn aıtty.

– Blog 20 aqpanda Almaty qalasynda quryldy. Barlyq partııanyń tiziminde kimder baryn aldyn ala qaradyq, zerdeledik. Partııa qataryndaǵy jastardyń úlesi qanshalyqty? Jastarǵa bó­lingen 30 paıyz kvota sharty qan­shalyqty oryndalyp jatqany­na nazar aýdardyq. Biz Májilis pen máslıhattarda oryndardy kvotany jabý úshin qoldanbaı, jas kandıdattarǵa qoldaý kórsetý ıdeıasyn alǵa tarttyq. Búginde 100-den astam jas úmitkerge qoldaý kórsetildi. Eń bastysy, biz olardy partııalar nemese salalar bo­ıynsha bólmeı, barlyq júgingen kandıdattarǵa kómektestik. Basty shartymyz – 35 jasqa deıingi jas­tar bolýy kerek edi. Árıne, bizdiń aýdıtorııamyz bar bolǵandyq­tan, negizinen áleýmettik jeliler­de aqparattyq qoldaý kórsetil­di. Jumysymyzdyń mańyzdy kórsetkishteriniń biri – jas kandıdat, qoǵamdyq pikir kóshbasshy­sy Dáýlet Muqaevtyń jeńisi, – dep atap ótti jýrnalıst Erqanat Kópjasaruly.

«Jastar úni» jas kandıdattardy qoldaý blogynyń ókilderiniń esep berý baspasóz brıfıngine Parlament Májilisi depýtattyǵyna kandıdat Dáýlet Muqaev ta qatysty.

– Myna hattamalardyń barlyǵyn qarap otyrsaq, 167 okrýgtiń basym bóliginiń barlyǵynda jeńiske jetkenbiz. Sondyqtan 10-15 mınýt buryn áleýmettik jelige salyp, súıinshimdi surap tastadym. Biraq resmı málimetti de kútemiz, – dedi Dáýlet Muqaev.

Jalpy bul jolǵy saılaý bılik júıesine ózindik ózgeristerin engizdi. О́ıtkeni Exit-poll nátıjesi boıynsha saıası dodaǵa túsken jeti partııanyń altaýy Parlamentke barýy múmkin. Onyń ishinde jyldar boıy osyny maqsat tutqan «Aýyl» men az ǵana ýaqytta quramyn jasaqtap, tartysqa túsken «Respublica» partııalary bar. Sondaı-aq bul eki elektorattyń – aýyl turǵyndary men jastardyń pozısııalarynyń nyǵaıa túskenin kórsetedi.

– Jas depýtattarǵa úlken jaýap­kershilik júktelip otyr. О́ıt­keni óz bilimimen, kúshimen alǵa sýyry­­lyp shyqqan, ózindik kon­sepsııa­sy bar jas­tardy jas saılaýshy­lar, qoǵamdyq pikir kósh­basshy­lary qol­daıdy. Olar shynymen de Par­lamentke jańashyldyq ákeletinine jáne zań shyǵarýshy organdardy «oıata alatynyna» senimdimiz, – dedi jýrnalıst Nursultan Qurman.

Aıtpaqshy, Eýrazııa ıntegra­sııalyq ınstıtýtynyń sa­rap­tama­syna sáıkes, Parla­ment Májilisinen «Amanat» partııa­sy 38-40 oryn, «Aýyl» partııasy 8 oryn, «Respublica» partııasy 6 oryn, «Aqjol» partııasy 6 oryn, «Ha­lyq partııasy» 5 oryn, JSDP 4 oryn alýǵa tıis.