Úndistannyń bas shahary – Delıde ótip jatqan bokstan qyzdar arasyndaǵy álem chempıonatynyń besinshi jarys kúninen keıin jerlesterimizdiń qatary sıreı bastady. Jahandyq dodanyń básekeleri bel ortasyna jetpeı jatyp, eki otandasymyz jarys jolynan shyǵyp qaldy. Birinshisi – eki dúrkin álem chempıony, 12 dúrkin el birinshiliginiń jeńimpazy Nazym Qyzaıbaı (50 kg) bolsa, ekinshisi – byltyrǵy Azııa chempıonatynyń 52 kılodaǵy qola júldegeri Jazıra Oraqbaeva.
Delıdegi əlem chempıonatynyń tórtinshi kúninde sharshy alańǵa Nazym Qyzaıbaı (50 kg) men Karına Ibragımova (57 kg) kóterildi. Olımpıada baǵdarlamasyna enetin eki salmaqtyń alǵashqysynda judyryqtasqan Nazym Qyzaıbaı Delıdegi tusaýkeser kezdesýinde vetnamdyq Thı Tam Ngýennen jeńilip qaldy. Boıy men qolynyń uzyndyǵyn utymdy paıdalanǵan Vetnam boksshysyna qazaqtyń daryndy qyzy esh qarsylyq kórsete almady.
Nazymnyń izin ala sharshy alańǵa 57 kılodaǵy Karına Ibragımova shyqty. Byltyr Ystanbulda ótken álem chempıonatynyń qola júldegeri alǵashqy aıqasynan-aq bıyl da júldeli oryndardan basty úmitker ekenin baıqatty. Birinshi kezdesýin kolýmbııalyq Valerııa Arboleda Mendosamen ótkizgen Karına qarsylasyn ekinshi raýndta tehnıkalyq nokaýtpen jeńip, kelesi kezeńge qınalmaı ótti.
Jarystyń kelesi kúninde boks jankúıerleri tórt otandasymyzdyń jekpe-jegin tamashalady. Mádına Nurshaeva (70 kg), Jaına Shekerbekova (54 kg) men Valentına Halzova (75 kg) básekelerin jeńispen aıaqtap, qazaq eline qýanysh syılasa, alǵashqy álem chempıonatyna qatysqan Jazıra Oraqbaeva (52 kg) el úmitin aqtaı almady.
Birinshi aınalymda taıpeılik Chan Chıa-Hsýndi nokaýtpen jeńip, mamandardyń nazaryn ózine aýdartqan Oraqbaeva ekinshi aınalymda úndistandyq Sakshı Sakshıden aılasyn asyra almady. Asa tartysty ótken kezdesýde sharshy alań qojaıyny tóreshilerdiń ortaq sheshimimen jeńiske jetti – 5:0.
70 kılo salmaqtaǵy Mádına Nurshaeva alǵashqy kezdesýinde koreıalyq Choı Hongıondi senimdi jeńdi. Birinshi jáne ekinshi raýndta belsendi bolǵan jerlesimiz sońǵy raýndta qarqynyn údetip, qarsylasyn bir márte nokdaýnǵa jiberdi – 5:0. Madına shırek fınalda brazılııalyq Barbara Dos Santospen qolǵap túıistiredi.
54 kılo salmaqtaǵy Jaına Shekerbekova ekinshi aınalymda ózbekstandyq azýly boksshymen judyryqtasty. 2021 jylǵy jastar arasyndaǵy álem chempıony Nıgına Ýktamova men álem birinshilikteriniń úsh dúrkin júldegeri Jaına aıanbaı aıqasty. Tehnıka jaǵynan da, soqqy jaǵynan da myqtylyq tanytqan jerlesimiz bul kezdesýdi óz paıdasyna aıaqtady. Shekerbekova shırek fınalda kolýmbııalyq Marsel Kastaned Arıaspen judyryqtasady. Aıta keteıik, jerlesimiz alǵashqy aınalymda Ońtústik Koreıa ókili E Chjı Imnen basym túsken bolatyn.
Besinshi kúnniń núktesin Valentına Halzova qoıdy. Buǵan deıin 70 kılo salmaq dárejesinde judyryqtasyp, bıyldan bastap Olımpıada baǵdarlamasyna enetin 75 kıloda óner kórsete bastaǵan Valentına Delıdegi álem chempıonatyn jeńispen bastady. Dúnıejúzilik dodanyń ekinshi aınalymynda qazaqstandyq boksshy venesýelalyq Marıelıs Irıspen judyryqtasty. Talaı dodalarda júlde alyp, boks mamandaryn myqtylyǵymen moıyndatqan otandasymyz venesýelalyq boksshyny esh qıyndyqsyz jeńdi – 5:0. Halzova kelesi kezeńde túrkııalyq Elıf Gıýnermen kezdesedi.
Al keshe byltyrǵy álem chempıonatynyń kúmis júldegeri, 2022 jylǵy Azııa chempıony 48 kılodaǵy Alýa Balqybekova, 57 kılodaǵy Karına Ibragımova, 63 kılo salmaqtaǵy Aıda Ábikeeva, 60 kıloda judyryqtasatyn Rımma Volosenko jáne 66 kılo salmaqtaǵy Nadejda Rıabes kezekti jekpe-jekterin ótkizdi.
A.Balqybekova reseılik Iýlııa Chýmgalakovamen, K.Ibragımova ázerbaıjandyq Mahsatı Hamzaevamen, A.Ábikeeva qytaılyq Chengıý Iаnmen judyryqtassa, R.Volosenko serbııalyq Natalıa Sadrınmen, N.Rıabes domınıkandyq Marı Moront Ernandespen qolǵap túıistirdi.