Amal merekesinde Qyzylordada jańa áýejaıdyń irgetasy qalandy. Jalpy aýmaǵy 7,5 myń sharshy metrden asatyn ǵımarat quny – 31 mln dollardy quraıdy.
– Áýe qatynasy úlken suranysqa ıe, serpindi damyp kele jatqan salanyń biri. Jolaýshylar jáne júk aǵymyn ulǵaıtý, qyzmet sapasyn jaqsartý úshin áýejaıdyń jańa termınalyn salý jóninde sheshim qabyldanyp, qurylys jumystary júrgizilýde. Ǵımarat Bolat О́temuratov qorynyń qarjysy esebinen salynady. Al ákimdik áýejaıdyń syrtqy ınjenerlik-kommýnıkasııalyq ınfraqurylymyn jetildirip, termınal aýmaǵyn abattandyratyn bolady. Jańa termınalda jolaýshylarǵa halyqaralyq standart talaptaryna saı barlyq jaǵdaı qarastyrylǵan. Atalǵan joba óńirimizdiń áleýmettik-ekonomıkalyq damýyna oń áserin tıgizip, áýe kóligi qyzmetin halyqaralyq deńgeıge jetkizýge, avıasııalyq qaýipsizdikti kúsheıtýge, jańa áýe baǵyttaryn ashýǵa múmkindik artady, – dedi oblys ákimi Nurlybek Nálibaev.
Jańa bastalǵan qurylys basynda qoǵam qaıratkerleri Bıǵalı Qaıýpov pen Ibragım Ábıbýllaev jaqsy bastamaǵa jolashar tilek aıtty. Nysan paıdalanýǵa berilgen kezde kólik salasynyń kórsetkishteri birneshe ese artady. Qazir jylyna 1400 reıs oryndalsa, 2025 jylǵa qaraı bul san eki ese ulǵaıady. Jolaýshy sany 260 myńnan 500 myńǵa jetedi. Al júk tasymaly 150 tonnadan 300 tonnaǵa deıin artady dep boljanýda.
Qurylys kezinde 600-den astam adam jumyspen qamtylsa, aıaqtalǵannan keıin 64 jańa turaqty jumys orny ashylady.
QYZYLORDA