Qarttarǵa syı-qurmet

Qazir ortalyqta 331 qart turady eken. Olardyń arasynda I, II toptaǵy múgedek jandar, ıakı zeınetkerler bar. Mekeme qyzmetkerleri qarttarǵa medısınalyq, psıhologııalyq, eńbek terapııasy, quqyq­tyq, ekonomıkalyq jáne basqa da birneshe áleýmettik qyzmet túrin usynady. Qarııa­lar jyl saıyn ataýly merekelerden qur qalmaı, mádenı is-sharalarǵa qatysady.

Osy joly aqsaqal atalar men aq jaý­lyqty analardyń qurmetine Memlekettik kúzet qyzmeti orkestriniń ónerpazdary konsert qoıdy. Orkestr quramynda Aızat Qarabekova, Asylhan Shalqarov, Erkebulan Sərsenbekov, Gúlsim Myrza­bekova, Baýyrjan Nurmuhanov syndy halyqaralyq jáne respýblıkalyq óner baıqaýlarynda tóbe kórsetip, top jarǵan mádenıet salasynyń maıtalmandary boldy. Jeztańdaı ánshiler orkestrdiń súıemeldeýimen qazaq jáne orystyń dástúrli ánderin birinen soń birin quıqyljyta shyrqady. Izinshe jıyl­ǵan kópshilik sheber kúıshilerdiń kúı tartysyna tánti boldy. Qonaqtardyń talaby men talantyna kýá bolǵan qarttar ónerpazdarǵa alǵys aıtyp, qoshemet kórsetti. Al Prezıdent is basqarmasy uıym­dastyrý-baqylaý jáne kadr jumysy bóli­mi meńgerýshisiniń orynbasary Shol­pan Jumaǵulova qarttarǵa alǵys aıtty.

– Jańa jyldyń bastaýy bolǵan Naýryz merekesi qutty bolsyn! Qazaq halqy­nyń qashanda úlkenge qur­met, kishige izet kórsete biletin qasıe­tin bilesizder. Búgin Prezıdent Is basqar­masynyń ujymy men oǵan qarasty vedomstvolar ózderińizge kelip, syı-sııapat kórsetýdi oılastyrǵan edi. Sizder eldiń órkendeýine, damýyna zor úles qostyńyzdar. Sizderge zor densaýlyq, uzaq ǵumyr tileımin,  dedi ol.

Oraıly sátte Prezıdent Is bas­qar­ma­syna qarasty Prezıdent Ákim­shiligi men Úkimetiniń ákimshilik ǵıma­rattary dıreksııasy, Memlekettik rezıdensııalar dıreksııasy, Medı­sınalyq ortalyq aýrý­hanasy jáne Materıaldyq-tehnı­ka­lyq qamtama­syz etý basqarma­synyń Ákim­shilik ǵımarattar dıreksııa­synyń qyzmet­kerleri Naýryz dastarqa­nyn jaıdy. Osy kúni Prezıdent Is bas­qarmasynyń mamandary óziniń jeke qorynan ákelgen kitaptaryn «Sha­rapat» ortaly­ǵynyń kitaphanasyna tapsyr­ǵanyn da aıta ketkenimiz lázim.

«Sharapat» áleýmettik qyzmet kórse­tý ortalyǵynda bólim meńgerýshisi bolyp eńbek etetin Sáýle Qaıyrovanyń aıtýynsha, Prezıdent Is basqarmasynyń ujymy ortalyqqa jylyna keminde bir márte qaıyrylyp, qarttardyń kóńilin kóterýge yqylas tanytady eken.

– Ortalyqta ár merekeni óz deńgeıin­de atap ótemiz. Prezıdent Is basqarmasy jyl saıyn keledi. Mekemede 16 ult­tyń qarttary turady. Barlyǵy bir otbasyndaı tatý-tátti ómir súredi. Orta­lyqtyń jańa, keń ǵımaraty 2007 jyly paıdalanýǵa berildi. Munda akt zaly, medısınalyq bólim, jattyǵý zaly, mýzeıden basqa da qyzmet kórsetetin bólimder bar. Qysqasy, qarttarǵa jaq­sy jaǵdaı jasalǵan. Uly Otan soǵysy­nyń ardageri 98 jasqa qaraǵan Raısa Safonchıva da osynda turady. Ol soǵysta poshtashy bolǵan. Qazir qyzy Reseıde,  deıdi bólim meńgerýshisi.

Prezıdent Is basqarmasynyń ujymy konserttik baǵdarlamadan keıin de qart­tar­dyń turmys ahýalymen tanysyp, emen-jarqyn áńgimelesti.