20-25 naýryz kúnderi Shymkent qalasynda jalpy bilim beretin pánder boıynsha oqýshylardyń respýblıkalyq olımpıadasynyń qorytyndy kezeńi ótti, dep habarlaıdy Egemen.kz elorda ákimdiginiń resmı saıtyna silteme jasap.
Astana qalasynan jaratylystaný-matematıka baǵyty boıynsha (9-11 (12) synyptar) 70 oqýshy baq synady.
Elordanyń jas zııatkerleri olımpıadadaǵy úzdik jetistikterimen qýantty. Jas olımpıadashylar 50 júldeli orynǵa ıe bolyp, joǵary bilim deńgeılerin kezekti ret dáleldedi. Sonymen Astana qalasynyń qorjynynda 7 altyn, 18 kúmis jáne 25 qola medal bar.
Elorda oqýshylarynyń olımpıadadaǵy kórsetkishteri jyl saıyn artyp keledi. Bıyl talantty oqýshylardyń olımpıadada qol jetkizgen júldeleriniń kórsetkishi 72% qurady. Al ótken 2021-2022 oqý jylynda bul kórsetkish 50% bolatyn.
Olımpıadanyń sońǵy kezeńindegi elordalyq oqýshylardyń jetistigi — olardyń tynymsyz daıyndyǵy jáne sol jolda jan-jaqty daıyndap, bilim nárimen sýsyndatqan jetekshileriniń jemisi. Oqýshylardyń óz qarym-qabiletimen qosa, talantyn tanyp, darynyn ushtaı bilgen ustazdardyń da eńbegi eren.
Pedagogterdiń joǵary kásibıligi men shyǵarmashylyq eńbeginiń arqasynda elordalyq oqýshylar jyl saıyn túrli deńgeıdegi zııatkerlik olımpıadalarda joǵary nátıjeler kórsetip keledi.