Qostanaıdaǵy oblystyq tarıhı-ólketaný murajaıynda «Uly dala ámirshileri» atty erekshe kórme ashyldy. Mýzeıdiń bas ǵımaratyndaǵy úlken zaldan oryn alǵan júzge jýyq kózaıym jádigerdiń bári el astanasyndaǵy Ulttyq mýzeıden ákelingen.
Myńjyldyqtarǵa ulasyp jatqan dala tarıhynyń erte kezeńderinen syr shertetin baǵa jetpes kóne jádigerlerdiń ishinde úsh birdeı «Altyn adam» bar. Onyń ishindegi eń áıgilisi – ótken ǵasyrdaǵy alpysynshy jyldardyń aıaǵynda ataqty arheolog-ǵalym Kemal Aqyshev jetekshilik etken qazba jumystary kezinde Esik qorǵanynan tabylǵan «Altyn adam».
Bizdiń dáýirge deıingi IV-III ǵasyrlardan jetken saq kóseminiń áskerı kıimi barys, bulan, taýteke, arqar, sáıgúlik keıpindegi 4 myńǵa jýyq altyn áshekeımen bezendirilgen. Qundy jádiger Uly dala tarıhynyń altyn óńdeý tehnologııasy men zergerlik óner damyǵan kóne kezeńderden syr shertip turǵandaı.
Kórmege qoıylǵan ekinshi «Altyn adam» – 1999 jyly belgili ǵalym Zeınolla Samashev jetekshilik etken arheologııalyq zertteý jumystarynyń nátıjesinde Atyraý óńirindegi Araltóbe obasynan tabylǵan Sarmat kósemi.
Tarıhı-tanymdyq máni zor ekspozısııanyń úshinshi bólimi «Taqsaı qazynalary» dep atalady.
«2012 jyly ǵalym Murat Sydyqov bastaǵan arheologııalyq qazba jumystary kezinde «Taqsaı» kesheninde júrgizilgen qazba jumystary barysynda ejelgi sarmat kezeńine jatatyn aqsúıek áıeldiń jerlengen orny tabylǵan. Qabirde áıel adamnyń altyn áshekeı buıymdary, erekshe shoshaq tóbeli altyndaǵan baskıim qaldyǵy, soǵys kórinisi beınelengen taraq, ózge de zattar bolǵan eken. Tabylǵan altyn buıymdardyń salmaǵy 3 kg-ǵa jýyq. Jalpy, Qazaqstan aýmaǵynda búginge deıin segiz altyn kıimdi adamnyń jerlengen orny anyqtalyp otyr», – deıdi oblystyq tarıhı-ólketaný mýzeıiniń dırektory Batyrhan Jumabaev.
Uıymdastyrýshylardyń aıtýynsha, «Uly dala ámirshileri» kórmesi 21 sáýirge deıin jumys isteıdi.
Qostanaı oblysy