Ulystyń uly kúni qarsańynda Qyzylorda qalasynyń sol jaǵalaýynda boı kótergen 40 páterli turǵyn úı baspanasy apatty dep tanylǵan turǵyndarǵa berildi. Osyǵan oraı ótken saltanatty sharada oblys ákimi Nurlybek Nálibaev keıingi jyldary Syr óńirinde turǵyn úı qurylysy aıtarlyqtaı damyp, qala aýmaǵy áldeqaıda ulǵaıǵanyn atap ótti.
Bıyl oblys ortalyǵyn kórkeıtýge qomaqty qarajat bólinip otyr. Beıbarys sultan kóshesiniń Nazarbaev dańǵylynan Qyzylorda – Qumkól tasjolyna deıingi bóligi keńeıip, abattandyrylady. «Qazaqstan temir joly» basshylyǵy temirjol vokzaly ǵımaraty men perrondy jańǵyrtýǵa qarajat bólmek. Jyl aıaǵyna deıin Syrdarııanyń sol jaǵalaýynan ınvestor qarjysyna avtovokzal salý josparlanýda.
– «QazGerMunaı» kompanııasy basshylyǵymen kelisim nátıjesinde qalada zamanaýı úlgidegi Oqýshylar saraıynyń jobasy bastalady. Quny 1,6 mlrd teńge bolatyn Neke saraıy shilde aıynda paıdalanýǵa berilmek. Al qurylysy byltyr bastalǵan О́ner ortalyǵy jeltoqsan aıynda, sol jaǵalaýdaǵy Qan ortalyǵy 2024 jyly el ıgiligine tabystalady, dedi aımaq basshysy.
Qonys toı ıeleriniń atynan zeınetker Álıma Ábisheva alǵys bildirip, jınalǵandardy Naýryz merekesimen quttyqtady. Bıyl qarjylandyrýdyń barlyq kózi esebinen 692 myń sharshy metr turǵyn úı paıdalanýǵa berilmek.
Qyzylorda