Almaǵaıyp zamannyń yńǵaıyna qaraı Máshhúr Júsiptiń zıraty úsh ret buzylyp, úshinshisinde 2006 jyly Eskeldi jotasyna úlken kesene turǵyzylǵany jurtqa aıan. Alaıda sol mańattaǵy ata qonysy – Sarybulaqty úıiniń mańyn jańǵyrtý, kóriktendirý eskerilmedi. 2000 jyly Máshhúr Júsiptiń shóbereleri Abaı Sharapıev pen Jastilek Kópeev tóbesi qulap, irgesi ǵana qalǵan orynǵa shatyrly úı salýmen ǵana shekteldi.
Qasıetti ata qonysty Lev Tolstoıdyń «Iаsnaıa polıanasyndaı» qylmasaq ta, adamdar izdep keletin kórikti mekenge aınaldyrsaq degen oı Máshhúr urpaqtaryna maza bermeıtin. Onyń ústine bul Máshhúr ata arýaǵyna taǵzym ete kelýshilerdiń de arman-tilegi edi. Máshhúr atanyń izi qalǵan, shıpaly bulaǵy aǵyp jatqan qasıetti qonysty jańǵyrtý, jańalaý, qalpyna keltirýdiń sáti 2021 jyldyń 19 mamyrynda ata shóberesi Abaı Sharapıev qurǵan «Máshhúr Júsip» qoǵamdyq qory arqyly bastaý aldy. 2020 jyldyń 6 maýsymynda qor tóraǵasy Abaı Sharapıev ekeýmiz ata qonysyn kóriktendirýdiń syzbasyn syzyp, jobasyn jasadyq. Esepshotta bir tıyn joq. Oıymyz – 1 gektar aýmaqty qorshaý, sol jerge aǵash otyrǵyzý, bulaq kózin ashý, Baıanaýyldan Samarqanǵa, Edil boıyna deıin mingen arbasyn qalpyna keltirý.
Qudaıdyń qudireti, dál osylaı bastalǵan jumysymyzǵa qoldaý bildirýshiler kóbeıe berdi. A.Sharapıevpen qyzmettes bolǵan Berik Saǵyndyqov qorshaý jabdyqtaryn taýyp berdi. Kerekýlik Dáýlet esimdi kásipker tamyz-jeltoqsan aralyǵynda aýmaqty qorshap shyqty. Kesenege táý etýge kelgen B.Nurjanov atyndaǵy GRES-1 stansasynyń jigitteri bulaq pen úıdiń aralyǵyna 20 túp qaıyń, 20 túp terek otyrǵyzdy. Sondaı-aq Qaraǵandy, Kókshetaý, Astana, Ekibastuz qalalarynan kelgen jandar da jıyny 40-tan asa shıe, shyrsha, qaraǵash sekildi aǵashtardyń kóshetin syılady. Qorshalatyn aýmaqtaǵy oı-shuńqyrdy tegisteý jumystaryn Ekibastuz qalasyn kógaldandyrýmen aınalysatyn «Flora» seriktestiginiń basshysy Alekseı Gorbýnov óz moınyna aldy.
Respýblıkaǵa belgili ónertapqysh, astanalyq ǵalym Nurmaǵabet Nurpeıisov bulaq kózine saraptama jasady. Bulaq kózi bylǵanbas úshin B.Nurjanov atyndaǵy GRES-1 stansasynyń qarjy dırektory Nurlan Jarkenov bastaǵan azamattar bulaqtyń ústin kúrkelep jaýyp berdi. Osylaısha, bulaq tóbesi, aınalasy jabylyp, onyń sýyn qubyr arqyly syrtqa shyǵaryp, sý tundyrǵysh shyǵyr qudyq jasap, bórene aǵashpen shegendedik. Shyǵyr qudyqty aǵash sheberi Qanat Ábleshev qona jatyp rettep berdi. Bulaq aınalasyn qajetti materıaldarmen kómkerýge, qosymsha qudyq qazýǵa, bulaq pen úı arasyna demalatyn samaljaı jasaýǵa Talǵat Masyǵutov demeýshilik kórsetti. О́tken jyldyń qyrkúıek aıynda ekskavatordyń kómegimen bulaq boıynyń 60 metr jeri belýardan qazylyp, eni de keńidi. Maqsatymyz – sýy jerge sińip, qorysqa aınalyp jatqan bulaq ishin, jylǵasyn taspen kómkerý.
Jazýshy Dıhan Ábilev pen Máshhúrdiń nemeresi Tóleýbaı Sharapıevtiń sıpattaýy boıynsha, Máshúr ata mingen trashpenke arbanyń nobaı sýretin salyp, aýyldyq jerden daıyn arba dońǵalaqtaryn izdestirdik. Shuǵa aýylynyń azamaty Qaýash Shiltibaev 4 dońǵalaq ákelip berdi. Ekibastuzdyq usta Temesh Taıjamalov bir aı merzimde trashpenkeni qurastyrdy.
Jaz boıy elimizdiń túkpir-túkpirinen, Reseıdiń Túmen, Novosibir ólkelerinen kelýshiler sany tolastamady. Osy oraıda Ekibastuz qalasynyń №36, 18, 22 jáne «Zerde» mektepteriniń oqýshylary men muǵalimderi, «Qaınar» mádenı ortalyǵynyń balalary, Pavlodar qalasyndaǵy mektepterdiń oqýshylary aǵash otyrǵyzýǵa, sýarýǵa qolǵabys jasaǵanyn aıta ketken jón. Qarjylaı kómek kórsetkender de kóp boldy. Ekibastuz qalasyndaǵy №36 mekteptiń dırektory Gúlnár Keńesqyzy, №22 gımnazııanyń ustazy Gúlbarshyn Arqalyqqyzy bastaǵan jandar ata qonysta Máshhúr oqýlaryn ótkizdi. Jaz boıy ata ósıetin, hıkmetin tyńdaýǵa, bilýge, taǵzym etýge myńnan asa adam keldi. Máshhúr shóberesi A.Sharapıev kelýshilerge otbasymen qyzmet kórsetti. Byltyr bul qonysyna elimizdiń belgili tulǵalary da táý ete kelgenin atap óteıik.
Máshhúr Júsip qonysyn kóriktendirý, jańǵyrtý, ashyq mýzeı jasaý, murasyn nasıhattaý, rýhanı ortalyq qurý jumysy jalǵasa beredi. Ata turǵan úıdi mýzeı etip jasap, qonys úıdi jeke salsaq degen de oıymyz bar.
Jumaǵalı QOǴABAI,
«Máshhúr Júsip» qoǵamdyq qorynyń quryltaıshysy
Pavlodar oblysy