Aýyldardy jańǵyrtatyn jobalar

Oblystyq ekonomıka jáne bıýdjettik josparlaý basqarmasy basshysynyń min­de­tin atqarýshy Rafık Ábýovtiń máli­me­tinshe, «Aýyl – el besigi» baǵ­dar­la­ma­sy aıasynda damý áleýeti bar 93 aýyl iriktelip alynǵan. Máselen, 2019-2022 jyldary atalǵan baǵdarlamamen 40 aýyl qamtylǵan. Úsh jylda bıýdjetten 24 mlrd teńge qaralyp, 41 joba iske asyrylypty.

– Bul joba turǵyn úı-kommýnaldyq sharýashylyǵyna qatysty 15, bilim berý, densaýlyq saqtaý, sport salalaryndaǵy 20 nysandy salýǵa múmkindik berdi. Kólik ınfraqurylymyn damytý úshin 6 nysan jańǵyrtýdan ótkizildi. Úsh jylda 768 jumys orny ashyldy. Bıyl 15 aýyldy jańǵyrtý úshin respýblıkalyq bıýdjetten 5,8 mlrd teńge bólinip, 22 jobany iske asyrý josparlandy, – deıdi Rafık Ábýov.

Máselen, Maqat aýdanynda byltyr 2 mlrd 36 mln teńgeniń 6 jobasy qolǵa alynǵan. Onyń ishinde tórt jobanyń qurylysy aıaqtalǵan. Dossor kentinde tórt oıyn alańynyń qurylysy bastalady. Oǵan 288 mln teńge bólingen. Aýdan ortalyǵy Maqat kentinde fýtbol, bas­ketbol, voleıbol alańdarymen qam­ty­la­tyn stadıonnyń qurylysyn júrgizý jos­parlanǵan.

Al oblystyq aýyl sharýashylyǵy bas­qar­masynyń basshysy Salaýat О́teǵu­lov­tyń málimetine súıensek, «Aýyl amanaty» jobasyna 1 mlrd 504 mln teńge qaralyp otyr. Jobaǵa qatysatyn kooperatıvter nemese jeke sharýashylyqtarǵa 2,5 pa­ıyzben nesıe berý kózdelgen. Máselen, kooperatıvterge – 27 mln, jeke qosalqy sharýashylyqtarǵa – 8 mln teńgege deıin nesıe alýǵa múmkindik bar.

– Baǵdarlamany qarjylandyrý tórt baǵytta júzege asady. Bul – agrarlyq-ónerkásiptik keshen salasyndaǵy taýarlardy óndirý jáne óńdeý, mal basyn kóbeıtip, ónim alý, jylyjaı salý men qyzmet kór­se­tý, sondaı-aq kooperatıvterdi jab­dyq­taý. Nesıe alýshylar eń aldymen, jeke ká­sipker retinde tirkelýi kerek. Basqa da nesıeler boıynsha merzimi ótken jarna bolmaýy tıis. Nesıe alý úshin min­det­ti túrde kepildik qajet. Oǵan qosa shar­ýashylyq isin bastaý úshin barlyq múm­kin­dikpen qamtamasyz etilýi shart, – dep habarlady Salaýat О́teǵulov.

«Aýyl amanaty» jobasymen beriletin jeńildetilgen nesıe sharttarynyń merzimi – 5, mal sharýashylyǵy salasyndaǵy jobalar úshin – 7 jyl. Nomınaldy jyl­dyq syıaqynyń mólsheri 2,5 paıyzdan aspaıdy. Pılottyq joba jergilikti at­qa­rý­shy organ senim bildirgen ókil ar­qy­ly júrgiziletin bolady. Qazir sondaı ókildi anyqtaý úshin konkýrs jarııalanǵan.

Memleket tarapynan jyl saıyn kásip­ker­lerdi qoldaý sharalarynyń aýqy­my keńeıip keledi. Oblystyq kásipkerlik jáne týrızm basqarmasynyń basshysy Nurbol Jańabekovtiń dereginshe, byltyr kásipkerlerdiń nesıesin sýbsıdııalaýǵa 6 mlrd teńge bólingen.

– Atyraý oblysynda «2021-2025 jyl­darǵa arnalǵan kásipkerlikti damytý jónindegi Ulttyq joba» jospary jú­ıeli júzege asyrylyp keledi. Joba­nyń maqsaty – kásipkerlerge qarjylaı qol­­­daý kórsetý. Onyń ishinde sýb­sı­dııa­­­­laý, kepildeme berý, jeńildikpen mık­­­ro­kredıtteý, ınfraqurylym qurylysy jáne memlekettik granttar berý qarastyrylǵan. Byltyr nesıeniń paıyzdyq mólsherlemesin sýbsıdııalaýǵa bıýd­jetten 6 mlrd teńge bólindi. Nátı­je­sin­de 1176 kásipkerdiń 35,6 mlrd teńgeni quraıtyn jobalary sýbsıdııa­landy. Bul jobalarda 1636 jańa jumys orny ashylady. Al bıyl kásipkerlerge sýbsıdııa berý respýblıkalyq bıýdjetten 1,9 mlrd teńge bólý josparlanyp otyr, – deıdi N.Jańabekov.

Basqarma basshysynyń aıtýyna qara­ǵan­da, ulttyq joba aıasynda 6 pa­ıyz­dyq mólsherlememen beriletin shaǵyn nesıe toptamasy bar. Monoqala men aýyldyq eldi mekender úshin bul nesıeler salalyq shekteýlersiz, ınvestısııalyq maqsattarǵa 20 mln teńgeden aspaıtyn somada, al aınalym aqshasyn tolyqtyrý úshin kepilzatsyz 5 mln teńgege deıin 5 paıyzdyq mólsherlememen beriledi. Sondaı-aq «Qarapaıym zattar ekonomıkasy» baǵdarlamasynyń basym jobalarynyń syıaqy mólsherlemesiniń bir bóligin sýbsıdııalaý, nesıelerge ishinara kepil bolý syndy nesıelendirý mehanızmin júzege asyrý jalǵasyp jatyr.

Oblystyq ındýstrııalyq-ınnova­sııa­lyq damý basqarmasy basshysynyń mindetin atqarýshy Qarlyǵash Bekbaeva málimetine súıensek, «Talshyqty-optı­ka­lyq baılanys jelileri tehnologııa­sy boıynsha aýyldyq eldi mekenderde keńjolaqty ınternet jelisine qol­je­tim­dilikti qamtamasyz etý» jobasyna sáıkes 130 eldi mekenge ınternet jelisi júr­gizilgen. Buǵan deıin 250-den astam tur­ǵyny bar 7 aýylǵa ınternet jelisi tar­tylǵan.

– Qazir Inder aýdanynyń Jarsýat, Qurylys, О́rken; Isataı aýdanyndaǵy Naryn, Jańa Janbaı; Qurmanǵazy aýdanynda ornalasqan Shaǵyrly, Ǵ.Álipov aýyldary Ksell baılanys operatorynyń 3G jáne 4G tehnologııasy boıynsha mo­bıldik ınternetpen qamtamasyz etildi. Al byltyrǵy jeltoqsanda Qurmanǵazy aýdanynyń Jambyl jáne Afanasev eldi mekenderi ınternet jelisine qosyldy, – dep málim etti Qarlyǵash Bekbaeva.

Endi bıyl Atyraý qalasynyń birneshe shaǵyn aýdanynda buryn tartylǵan keńjo­laq­ty ınternet jelisi jańartylady. Naqtylaı aıtqanda, «Kar-Tel» JShS Erkinqala-2, Aqjar, Aqjar-2, Juldyz-3 shaǵyn aýdandarynda jańa bazalyq stan­sa­lardyń qosymsha qurylysyn salýdy qolǵa alady.

Atyraý oblysy