QYZYLORDA. 1 shilde. Qyzylorda oblysynyń ákimi Qyrymbek Kósherbaev «Qazaqstan Barysy-2014» týrnıriniń qola júldegeri Rýslan Ábdirazaqov pen atalǵan jarystyń tuńǵysh jeńimpazy Ulan Rysquldy jáne aqyn Nurmuhammed Ábilqasymovty qabyldady. Bul týraly egemen.kz tilshisi habarlady.
Jalpy, jurtshylyq Ulan Rysqul men Rýslan Ábdirazaqovty jaqsy biledi. Al aqyn Nurmuhammed Ábilqasymovty az-kem tanystyra ketsek.
Nurmuhammed – týǵannan eki aıaǵy men eki qoly istemeıtin, múmkindigi shekteýli jan. Biraq ómirge degen qulshynysy erekshe. Mektepte bilim almaǵan. О́zdigininen saýat ashqan. Jastaıynan óleń jazady. Qolyna qalam ustaı almaıtyn, sóziniń ózi asa uǵynyqty emes aqyn óleńdi qalaı jazady dersiz? Aıtaıyq. Ol aýzyna qalamdy tistep, telefonnyń pernelerine jyryn túsiredi. Nurmuhammedtiń qanshalyqty eńbekqor ekeni osydan-aq bilýge bolady. Osy kóktemde ekinshi jyr keshin ótkizdi. Aqynnyń keshine qatysqan aǵaıyn zaldan janarlaryn súrtip shyqty. «Taǵdyrymnyń janary» atty jyr kitaby da bıyl jaryq kórdi.
Qyrymbek Kósherbaev: «Ulttyq qundylyqtardy saqtaýǵa, nasıhattaýǵa, dáripteýge kelgende Syr óńiri ózgelerge úlgi bolýy kerek. О́ıtkeni Elbasynyń ózi «Syr – Alashtyń anasy» dep ataǵan. Osy turǵydan alǵanda «Qazaqstan Barysy» jarysy bastaýyn Qyzylorda oblysynan alǵanyna qýanamyz. Qazaq kúresi bilik pen bilektiń saıysy. Sondyqtan qazaq kúresiniń biz úshin orny bólek. Al Rýslannyń búgingi qola júldesi erteń altynǵa aınalaryna senim mol», – dedi.
Qyzylordada jyl saıyn qazaq kúresinen «Altyn belbeý» jarysy ótedi. Bıylǵy jarysqa ártúrli jas pen salmaqtaǵy 7 172 palýan qatysypty. Osyny sózine arqaý etken oblys ákimi Rýslan men Ulannyń izbasarlary aýylda ósip kele jatqanyn aıtty.
Al aqyn N. Ábilqasymov jóninde óńir basshysy: «Nurmuhammedtiń ómirimen tanysqanda bir jaǵynan tolqydym. Ekinshi jaǵynan qýandym. Bala kúninen aýyr dertke ushyraǵan jigittiń ómirge degen talpynysyn kórip tolqydym. Tepse temir úzetin azamattar Úkimetke alaqan jaıyp otyrǵanda, Nurmuhammed ómirdiń aýyr synaǵyna moıymaı, alǵa umtylǵanyn kórip qýandym. «Taǵdyrymnyń janary» atty kitabyn tolyq oqyp shyqtym. Kitap ómirge degen qushtarlyqqa tunyp tur eken»,– dedi.
Q.Kósherbaev sóz sońynda Ulan Rysqulǵa 3 bólmeli, Rýslan Ábdirazaqov pen Nurmuhammed Ábilqasymovtyń árqaısyna 2 bólmeli páterden beriletinin aıtyp, aqyn men balýandarǵa baspana kiltin tabys etti.
Tuńǵysh «Qazaqstan Barysy» Ulan Rysqul óz kezeginde keler jylǵy jarysta jeńispen oralamyn dep ýáde berdi. Odan keıin sóz alǵan Rýslan Ábdirazaqov oblys ákimine qurmeti úshin alǵysyn bildire kelip: «Negizi daıyndyǵym jaqsy boldy. О́z-ózime jeńistiń bıik tuǵyrynan kórinýge ýáde bergem. Biraq sál sáttilik jetispedi. Keler jyly bas júlde ıelený úshin barymdy salamyn. Tipti, «Qazaqstan Barysynda» Ulanmen jolyqsam da beldesýdi bermeımin, Syr óńirine jeńisti men ákelemin» dedi. Zalda otyrǵandar dý qol shapalaqtap jiberdi. Al Qyrymbek Eleýuly «О́mirde baýyryń, aǵań, ustazyń bolǵanymen kilemde aǵaıyn joq. Barlyǵy qarsylas», – dep Rýslannyń sózin qýattady.
Al aqyn N.Ábilqasymov: «Jyqqanda tasymaıtyn, jyǵylǵanda jasymaıtyn azamattar kóp bolsyn! Alla bergen bar múmkindikti paıdalanyp ómir súrip kelemin. Meniń taǵdyryma beı-jaı qaramaı, Jaratqan bergen azǵantaı ǵana ónerimdi joǵary baǵalap jatqan el men el aǵalaryna zor alǵys bildiremin», – dedi.
Erjan Baıtiles.
Derekkóz: egemen.kz.
Foto: egemen.kz.