ASTANA. 1 shilde. Búgin túnde San-Paýlý qalasynda Argentına jáne Shveısarııa quramalary arasynda 1/8 fınaldyq oıyn oınaldy. Matchtyń negizgi ýaqyty 0:0 esebimen teń aıaqtaldy. Al overtaımda argentınalyqtar 1:0 esebimen jeńiske jetti. Bul týraly egemen.kz habarlady.
Ońtústik Amerıka qurlyǵynyń bul quramasy buǵan deıingi birde-bir matchta ózin keremet oıyndarymen kórsete almady. Soǵan qaramastan, topta 9 upaıdy túgel alyp, kelesi kezeńge birinshi bolyp ótti. Al eýropalyqtar ózin qımyl-qozǵalysyn aldyn ala boljaý qıyn jumbaq komanda retinde tanytty.
Argentına – Shveısarııa 1:0. Negizgi ýaqyt - 0:0. Overtaım - 1:0.
1 shilde. San-Paýlý. «Arena Korıntıans» stadıony. Tóreshi - Iýnas Erıksson (Shvesııa).
Argentına: Serhıo Romero, Pablo Sabaleta, Ezekıel Garaı, Markos Roho (Hose Marııa Basanta, 45), Federıko Fernandes, Haver Maskerano, Fernando Gago, Anhel dı Marııa, Lıonel Messı, Ezekıel Lavessı, Gonsalo Igýaın.
Shveısarııa: Dıego Benalo, Stefan Lıhtshtaıner, Iohan Djýrý, Rıkardo Rodrıges, Fabıan Sher, Valon Behramı, Gekhan Inler, Granıt Djaka (Jelson Fernandes, 66), Jerdan Shakırı, Admır Mehmedı (Blerım Djemaılı, 113), Iosıp Drmıch (Harıs Seferovıch, 82).
Gol: Anhel dı Marııa (118).
Eskertýler: Markos Roho (90) - Granıt Djaka (36), Jelson Fernandes (73).
Chempıonattyń 1/8 fınalynda taǵy da Kári qurlyq pen Jańa dúnıeniń, ıaǵnı Eýropa men Ońtústik Amerıkanyń teketiresi oryn aldy. Al búgingi eki quramanyń buǵan deıingi ózara kezdesýleri sanyna kelsek, Argentınanyń aıqyn basym bolǵanyn baıqaýǵa bolady. Olar 6 ret kezdesse, sonyń 4-nde amerıkalyqtar jeńip, 2 oıynda qarsylastar teń tarqasqan. Munda argentınalyqtar 14 gol soǵyp, bar-joǵy 3 dop jiberip alǵan.
Qarsylastar kezdesýdiń alǵashqy 15 mınýtyna deıin bir-birleriniń qaqpalaryna pálendeı qaýip tóndire almady. Degenmen, bul aralyqta argentınalyqtardyń azdaǵan artyqshylyǵy baıqalǵany da ras. Olar shveısarııalyqtardyń qorǵanys shebin birneshe ret buzyp ótti. Eýropalyqtar osydan keıin ǵana qarsy alań betine qaraı sholǵyndap bara bastady.
Buǵan deıin boljanǵandaı, Argentına birinshi taımda kezdesýdiń favorıti rólinde kórindi. Olar dopqa da kóbirek egelik etti, shabýyldy da artyǵyraq jasady. Biraq Shveısarııa fýtbolshylarynyń sırek jasaǵan qarsy shabýyldary qaýiptirek bola tústi. Taımnyń sońynda olar eki ret gol soǵý sátinde turdy. Alǵashynda 39-mınýtta olar qaýyrt joryqqa shyqty. Oń qaptaldan Iosıp Drmıchke pas tastaldy. Qaqpashy Serhıo Romero ony qaǵyp alýǵa umtyldy. Biraq múlt ketti. Ony ilip áketken Iosıp aıyp alańyna kirip, Romerodan asyryp atty. Alaıda, óte baıaý ushqan dopty qaqpashy ońaı qaǵyp aldy. 45-mınýtta Jerdan Shakırı uzaq arbasyp baryp, qaqpaǵa qaraı dop áýeletti. Ony golkıper syrtqa shyǵaryp jiberdi.
Ekinshi taım da Argentınanyń shabýylymen bastaldy. Biraq birer mınýttan keıin qarsy shabýyl jasaýdy qaıta qolǵa alǵan Shveısarııanyń árbir alǵa umtylysy taǵy qaýipti bola tústi. 50-mınýtta Romero eýropalyqtar urǵan bir dopty jap-jaqsy qaǵyp alyp turyp, kenet qolynan túsirip jiberdi. Al dop qaqpaǵa qaraı domalap bara jatqanda, ony ózi baýyrymen basyp toqtatty.
58-mınýtta argentınalyqtarǵa kezek keldi. Lıonel Messı alańnyń ortasyn jaryp ótip, aıyp alańynyń sol qaptalyna kirgen Markos Rohoǵa dop jetkizdi. Al qorǵaýshy alǵan dobyn qaqpanyń lasy buryshyna qaraı zyrlatty. Ony qaqpashy Dıego Benalo qolynyń ushymen syrtqa shyǵaryp úlgerdi. 62-mınýtta eýropalyq qaqpashyǵa taǵy erlik kórsetýge týra keldi. Taǵy Roho sol qaptaldan ashyldy. Al pas alǵasyn aıyp alańynyń ortasyna kirdi. Sosyn qaqpaǵa qaraı baǵyttady. Qaqpashy ony bir qolymen qaǵyp jiberdi. Mundaı jaǵdaı bul darbaza mańynda 67 jáne 77-mınýttarda da qaıtalandy. Bularda da golkıper qaqpa toryn aman saqtap qaldy.
Budan ary da Roho men Messı osyndaı oqıǵalardyń ortasynan tabylyp jatty. Shveısarııalyqtar qorǵanys shebi setineı bastaǵandaı kórindi. Biraq qaqyrap ketken joq. Olar shabýyldy barynsha jantalasyp qaıtaryp baqty. Osymen oıynnyń negizgi ýaqyty da bitti. Al qosymsha taım bitýge 2 mınýt qalǵan shamada argentınalyq Anhel dı Marııa gol soǵyp, óz komandasyna jeńis syılady. Ras, budan keıin shveısarııalyqtar esepti teńestirýge bir ret múmkindik alyp edi, ony tıimdi paıdalana almady.
Sonymen, Argentına shırek fınalǵa shyqty. Ol endi Belgııa – AQSh matchynyń jeńimpazymen 5 shilde kúni kezdesedi.
Damır Qojamqul.
Derekkóz: egemen.kz.
Foto: Sportbox.ru.