Memleket basshysy Qasym-Jomart Toqaev Qazaqstan halqyna Joldaýynda ana men balany qoldaýǵa basa nazar aýdardy. Elordada atalǵan baǵytta birqatar naqty shara qabyldandy. Osy týraly onlaın-brıfıngte Astana qalasy boıynsha Eńbek jáne áleýmettik qorǵaý komıteti basshysynyń áleýmettik máseleler jónindegi orynbasary Dámejan Sádýaqasova aıtyp berdi, dep habarlaıdy Egemen.kz qalalyq ákimdiktiń resmı saıtyna silteme jasap.
Aıta ketý kerek, balaly otbasylardy áleýmettik qamsyzdandyrý járdemaqylardyń birneshe túrin qamtıdy:
- balanyń týýyna birjolǵy járdemaqy (2023 jyly birinshi, ekinshi, úshinshi balanyń týýyna beriletin járdemaqy mólsheri 131100 teńgeni (38 AEK), tórtinshi jáne odan da kóp balaǵa 217350 teńgeni (63 AEK) quraıdy;- jumys istemeıtin áıelder úshin respýblıkalyq bıýdjet esebinen bala bir jarym jasqa tolǵanǵa deıin tólenetin járdemaqy. Bul járdemaqy mólsheri AEK-ke baılanysty jáne otbasyndaǵy bala sanyna qaraı tólenedi.
- 18 jasqa deıingi múgedek balany tárbıelep otyrǵan anaǵa nemese ákege, bala asyrap alýshyǵa, qamqorshyǵa (qorǵanshyǵa) tólenetin aı saıynǵy memlekettik járdemaqy. 2023 jyly 56794 teńge mólsherinde (eń tómengi kúnkóris deńgeıiniń 1,4 mólsherinde).
- «Altyn alqa», «Kúmis alqa» alqalarymen marapattalǵan nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen marapattalǵan kópbalaly analarǵa tabysyna qaramastan tólenetin aı saıynǵy memlekettik járdemaqy (járdemaqy mólsheri qazirgi ýaqytta 22080 teńgeni (6,4 AEK) quraıdy). Elorda boıynsha 6 myń áıel kópbalaly ana retinde aı saıyn járdemaqy alady, onyń ishinde 1739 áıel – «Altyn alqa» alqa ıegeri, 3788 áıel – «Kúmis alqa» alqa ıegeri, 241 áıel – «Batyr ana» ordenimen marapattalǵan jáne 232 áıel – «1 jáne 2 dárejeli Ana dańqy» ordenimen marapattalǵan.
- kámeletke tolmaǵan nemese 18-23 jas aralyǵynda kúndizgi nysan boıynsha oqıtyn 4 jáne odan kóp balasy bar kópbalaly otbasylarǵa járdemaqy taǵaıyndalady.
Astana qalasynda 2023 jyldyń 1 naýryzyndaǵy jaǵdaı boıynsha 28 267 otbasy osy járdemaqyny alýshylar bolyp sanalady.
«Jumys isteıtin áıelderge bala kútimine baılanysty beriletin aı saıynǵy járdemaqy Memlekettik áleýmettik saqtandyrý qorynan áleýmettik tólem retinde tólenedi. Bul tólemniń mólsheri bala týǵanǵa deıingi 24 aıdyń ortasha tabys mólsheriniń bóligi retinde esepteledi jáne bala bir jarym jasqa tolǵansha tólenedi», dedi spıker.