Keshe Ortalyq kommýnıkasııalar qyzmetinde Úkimettiń dástúrli otyrysynyń qorytyndylaryna arnalǵan brıfıng ótti. Onda úsh vedomstvo basshysy Úkimette qaralǵan máseleler týraly áńgimeledi.
Mınıstrlerdi bastap kelgen Ekonomıka jáne bıýdjettik josparlaý mınıstri Erbolat Dosaev Áleýmettik-ekonomıkalyq saıasattyń 2014 jylǵa arnalǵan jol kartasynyń 38 is-sharasy oryndalǵanyn aıtty. «Memleket basshysynyń tapsyrmasy boıynsha eldiń ornyqty damýyn qamtamasyz etý úshin aǵymdaǵy jylǵy sáýirde Úkimet Áleýmettik-ekonomıkalyq saıasattyń 2014 jylǵa arnalǵan birinshi kezektegi sharalarynyń jol kartasyn qabyldady. Jol kartasy 10 baǵyt boıynsha 67 is-sharadan turady. Búgingi kúni 38 is-shara oryndaldy. 29 is-shara oryndalýda. Beseýi aǵymdaǵy jylǵy ekinshi jartyjyldyqqa josparlanǵan. Taǵy 5 is-sharanyń oryndalý merzimi toqsan saıyn jáne jartyjyldyq kezeńge belgilengen. Jol kartasynyń sheńberinde josparlanǵan 4 joba Prezıdent Ákimshiligine engizildi. 7 joba boıynsha 4 zań qabyldandy. Úsh zań jobasy bıylǵy jyldyń ekinshi jartyjyldyǵynda ázirlenedi dep josparlanǵan. Úkimet qaýlylarynyń 8 jobasy daıyndalyp, olar qabyldandy», dedi E.Dosaev.
Vedomstvo basshysy Jol kartasyn oryndaý aıasynda makroekonomıkalyq turaqtylyqty qamtamasyz etýge baǵyttalǵan is-sharalardyń nátıjesi týraly da aıtty. «Ulttyq valıýta baǵamy túzetilgennen keıin ınflıasııalyq prosesterdi josparlanǵan dálizde ustap turý úshin sharalar qabyldandy. Bes aıdyń qorytyndysy boıynsha aǵymdaǵy ınflıasııa kórsetkishi 4,5 paıyzdy qurady.
«Azyq-túlik taýarlarynyń tapshylyǵyna jol bermeý úshin jergilikti atqarýshy organdarǵa azyq-túlik taýarlarynyń óńirlik turaqtandyrý qorlaryn qurý jáne paıdalaný kezinde barynsha derbestik berildi. Al endi ekonomıkalyq ósýge yntalandyrý jáne ekonomıkanyń naqty sektoryn qoldaýǵa qatysty jumystarǵa toqtalsaq, Memleket basshysynyń Ulttyq qordan bólingen 1 trıllıon teńge esebinen ekonomıkanyń ósýin qosymsha yntalandyrý jónindegi tapsyrmasyn iske asyrý qamtamasyz etilýde. Naqty málimet keltirer bolsaq, osy jyly ekonomıkalyq ósýdi qamtamasyz etýge 500 mlrd. teńge, onyń ishinde shaǵyn jáne orta bıznesti nesıeleýge jáne qoldaýǵa 100 mlrd. teńge, bank sektoryn saýyqtyrýǵa 250 mlrd. teńge jáne ındýstrııalyq-ınnovasııalyq damý jobalaryn iske asyrýǵa 150 mlrd. teńge jumsaldy. Onda ınjenerlik ınfraqurylymdy damytý, ındýstrııalyq jobalardy, EKSPO-2017 kórmesine qatysty jobalardy ishinara qarjylandyrý qarastyrylǵan», dep qaıyrdy E.Dosaev.
Onyń aıtýynsha, Ulttyq qordan bólinetin qarajatty tıimdi paıdalaný úshin Úkimet birqatar halyqaralyq qarjy uıymdarymen ınstıtýttyq jáne qarjylaı demeý boıynsha kelisimderge qol qoıǵan. Olardyń arasynda Dúnıejúzilik bank, Azııa damý jáne qaıta qurý banki, Eýropa qaıta qurý jáne damý banki men Islam damý banki bar. «Osy halyqaralyq bankter ekonomıkanyń negizgi salasyndaǵy ınvestısııalyq jobalar men basym baǵdarlamalardy birlese qarjylandyrýdy qamtamasyz etedi. Bular 2014-2016 jyldar aralyǵynda júzege asatyn bolady. Birlese qarjylandyrýdyń jalpy mólsheri 7,5 mlrd. dollarǵa deıin», dedi mınıstr. Buǵan qosa, mınıstr Jol kartasy aıasynda júıe qurýshy kásiporyndardyń úzdiksiz jumys isteýin qamtamasyz etý maqsatynda óndirý jaǵdaıy aýyr jáne rentabeldiligi tómen ken oryndary úshin Úkimet alǵashqy ret paıdaly qazbalar óndirisine salynatyn salyqtyń tómendetilgen mólsherlemesin belgilegenin atap ótti. Sonymen qatar, eksporttaýshylardy qoldaý úshin temirjol kóligimen tasymaldaýǵa arnalǵan tarıfterge ýaqytsha tómendetý koeffısıentterin berý tetigi engizilgenin tilge tıek etti.
Baspasóz máslıhatynda elimiz bıylǵy jyldyń sońyna deıin 10 myń tonnaǵa jýyq iri qara mal etin eksportqa jóneltiletindigi de aıtyldy. «Iri qara mal etiniń ekporttyq áleýetin arttyrý jobasy 2012 jyldan beri júzege asyrylýda. Joba barlyq oblystarda birdeı júrgizilip jatyr dep aıta almaımyz. Mysaly, Batys Qazaqstan, Aqmola oblystarynda bul kórsetkish barlyq analyq iri qara malǵa shaqqanda 35 paıyzdan artyq. Al keıbir oblystarda bul kórsetkish tómen. Aýdandar arasynda da osyndaı reıtıng jasaldy», dedi ol jóninde Aýyl sharýashylyǵy mınıstri Asyljan Mamytbekov.
Vedomstvo basshysy Qazaqstanda agroónerkásiptik keshendi damytý memlekettik baǵdarlamasy aıasynda nesıelik júktemeni tómendetý týraly agroónerkásiptik sektor sýbektilerinen 217 ótinish kelgeni týraly da áńgimeledi. «Baǵdarlama agroónerkásiptik keshen sýbektilerin qarjylyq saýyqtyrý boıynsha tıisti tetikterdi qarastyrady. Bul turǵyda burynǵy kredıtorlyq qaryzdardy tómendetý men merzimin uzartý eskerilgen. Búginde 167 mlrd. teńge kóleminde agroónerkásiptik keshen sýbektileriniń 217 ótinishi maquldandy», dedi mınıstr. Onyń keltirgen taǵy bir málimetine qaraǵanda, bıylǵy jyldyń sońyna deıin bul baǵytta 300 mlrd. teńgeni ıgerý josparlanyp otyr.
О́ńirlik damý mınıstrligi jylý jelilerin jańǵyrtý boıynsha keshendi jospar ázirleýge kiriskeli otyr eken. «Búgin Úkimet otyrysynda jylýmen jabdyqtaý sektoryn jańǵyrtý máseleleri qaraldy. Búgingi kúni bul sektorda tozý deńgeıi joǵary. Aıtalyq, jelilerdiń 40 paıyzy tolyǵymen tozǵan. Sondaı-aq, jylý elektr stansalary men iri qazandyqtardy esepke almaǵanda, jylýmen jabdyqtaý kózderi boıynsha da jaǵdaı nashar. Munymen qatar, tutynýshylarǵa qatysty máselelerge toqtalsaq, turǵyndar jylý eseptegish qurylǵylardy ornatpaıdy, ǵımarattarda termojańǵyrtý júrgizilmeı keledi. Sondyqtan, búgin jylý jelilerin jańǵyrtý boıynsha keshendi jospardyń baǵyt-baǵdary talqylandy. Bul keshendi jospardy daıyndaýǵa biz kirisýimiz kerek. Josparǵa saı, jylý kózderi tehnıkalyq tekseristen ótkiziledi. Onyń nátıjesi boıynsha jylý jelileriniń tehnıkalyq jaǵdaıyna baǵa beriledi, ınvestısııalaýdyń negizdemesi ázirlenedi, qalalar men aýyldardy jylýmen jabdyqtaýdyń syzbanusqasy men biryńǵaı tehnıkalyq saıasat daıyndalady», dedi bul jóninde О́ńirlik damý mınıstri Bolat Jámishev.
Nurbaı ELMURATOV,
«Egemen Qazaqstan».