Qazaqstanda qor naryǵynyń damý qarqyny joǵarylap keledi. Qazirgi ýaqytta «Qazaqstan qor bırjasynyń» (KASE) saýda tiziminde 99 emıtenttiń 113 aksııasy saýdalanyp jatyr. Olardyń 46 shyǵarylymy KASE Global sektorynda aınalysqa jiberildi. 2023 jylǵy qańtarda aksııalarmen saýda-sattyq kólemi 2022 jylǵy jeltoqsan aıymen salystyrǵanda 90,4%-ǵa nemese 180 mlrd teńgege tómendep, 19 mlrd teńgeni quraǵan.
Qarjy naryǵyn retteý jáne damytý Agenttiginiń málimeti boıynsha, korporatıvtik oblıgasııalar naryǵy aqsha-kredıt talaptaryn qatańdatý aıasynda qorlandyrý qunynyń qymbattaýy, sondaı-aq osy naryqta qoldanystaǵy shyǵarylymdardy óteý nátıjesinde 2023 jylǵy qańtarda 0,3%-ǵa nemese 42 mlrd teńgege, 14,4 trln teńgege deıin azaıdy.
«Korporatıvtik oblıgasııalardyń bastapqy naryǵynyń kólemi 2023 jylǵy qańtarda 146 mlrd teńgeni qurady, bul 2022 jylǵy jeltoqsan aıymen salystyrǵanda 64,4%-ǵa nemese 264 mlrd teńgege tómen. 2023 jylǵy 1 aqpanda KASE saýda-sattyq tizimderinde 82 emıtenttiń korporatıvtik oblıgasııalarynyń 342 shyǵarylymy boldy. Qańtarda KASE-de korporatıvtik oblıgasııalarmen saýda-sattyq kólemi 66,3%-ǵa nemese 363 mlrd teńgege, 184 mlrd teńgege deıin azaıdy», delinedi habarlamada.
Qańtar aıynyń qorytyndysy boıynsha KASE-de memlekettik baǵaly qaǵazdarmen saýda-sattyqtyń jıyntyq kólemi bir aıda 22,8%-ǵa nemese 153 mlrd teńgege azaıyp, 516 mlrd teńgeni quraǵan. Sondaı-aq memlekettik baǵaly qaǵazdardyń bastapqy naryǵyndaǵy saýda-sattyq kólemi 21,8%-ǵa nemese 125 mlrd teńgege 450 mlrd teńgege deıin tómendegen.
Ujymdyq ınvestısııalar naryǵynda 47 ınvestısııalyq paı qory jumys istedi, onyń ishinde 24 aralyq, 21 jabyq jáne 1 ashyq paı qory.
Baǵaly qaǵazdar naryǵynyń ınstıtýsıonaldyq qurylymynda 2023 jylǵy 1 aqpandaǵy jaǵdaı boıynsha 38 broker men dıler (15 bank jáne 23 banktik emes uıym), 9 kastodıan bank, 20 ınvestısııalyq portfeldi basqarýshy, 3 transfer-agent, sondaı-aq 2 ınfraqurylymdyq uıym: KASE jáne biryńǵaı tirkeýshi jáne saýda repozıtorııi fýnksııalaryn oryndaıtyn Baǵaly qaǵazdardyń ortalyq depozıtarııi jumys isteıdi. Budan basqa, KASE negizinde ortalyq kontragent jumys isteıdi.
Investorlar sany da ósip keledi. Deponentter klıentteriniń qosalqy shottarynyń sany 581 776 qosalqy shotqa deıin 31 549-ǵa nemese 5,7%-ǵa ósti.