Jetisýǵa kóktemniń erte keletini belgili. Bıyl óńirde kóktemgi dala jumystary ádettegiden bir apta buryn bastaldy. Bıyl jetisýlyq dıqandar egis alqabyn 519,1 myń gektarǵa deıin jetkizýdi josparlap otyr. Bul kórsetkish byltyrǵymen salystyrǵanda 2 myń gektarǵa artyq.
Agrarly óńirdiń birden bir jetistigi – egin salasy. Halqy da soǵan beıimdelgen. Bıyl fermerler jyldaǵydaı emes, iske belsene kiristi. Oblystyq aýyl sharýashylyǵy basqarmasy basshysynyń orynbasary Baqtııar Shampıkovtyń sózine súıensek, sharýalarǵa berilgen kómek te byltyrǵyǵa qaraǵanda edáýir kóbirekteý. Demek eńbek etem degen adamǵa esh kedergi joq.
«Osy jyly egis alqaptaryn ártaraptandyrý aıasynda qant daqyldarynyń alqaby eki esege jýyq ulǵaıtylyp, 8,1 myń gektar boldy. Memleket basshysynyń tapsyrmasymen, sondaı-aq qant qyzylshasyn damytýdyń keshendi josparlaryn oryndaý úshin aýyl sharýashylyǵy taýaryn óndirýshilerdi qoldaý sharalary júrgiziledi. Atap aıtsaq, olarǵa tuqym máselesimen, mıneraldy tyńaıtqyshtarmen jáne qarjylyq qoldaý kórsetý boıynsha qamtamasyz etý jaǵy qarastyrylǵan. Bıyl bizge qajetti egis birligi 11,4 myń bolsa, onyń 10 myńyn Kóksý qant zaýyty qamtamasyz etip otyr. Qazirdiń ózinde sharýa qojalyqtary 4 myńǵa jýyq egis agregatyn tańdap alǵan», deıdi B.Shampıkov.
Onyń aıtýynsha, kóktemgi dala jumystaryna Kóksý qant zaýyty 700 mln teńge kóleminde qarjylaı qoldaý kórsetpek. Sharýalar dızel otynymen qamtamasyz etildi, bıylǵa josparlanǵan 10 myń tonna dızel otynynyń 3,2 myń tonnasy munaı bazalaryna jetkizildi. Baǵasy lıtrine –212 teńge.
Jalpy, kóktemgi egin egý úderisi turaqty júrip jatyr. Tehnıka aýyl sharýashylyǵy jumystaryn júrgizýge tolyqtaı daıyn.
Qarańyz, 2022 jyly 9,1 mlrd teńgege 546 birlik tehnıka satyp alynǵan. Bıyl taǵy 650 tehnıka satyp alý josparlanǵan. Qazirgi tańda aýyl sharýashylyǵy qurylymdarynda 9,7 myń traktor, 1,5 myń tuqym sepkish jáne 11,9 myń topyraq óńdeıtin tehnıka bar. Kóktemgi dala jumystaryna jalpy daıyndyq 97 paıyzdy qurap otyr.
Taǵy bir aıta keterlik jaıt, búginde nesıeler qarjy ınstıtýttary arqyly berilip jatyr. Jalpy, kóktemgi dala jumystaryna «Keń dala» jáne «Agrobıznes» baǵdarlamalary aıasynda 5 mlrd teńge bólý josparlanýda. Qazirdiń ózinde 585 mln teńge nesıe berilgen. Jalpy, kóktemgi dala jumystarynyń daıyndyǵy men júrgizilýi jiti baqylanyp otyr.
Jetisý oblysy