Memleket basshysy Q.Toqaevtyń VIII saılanǵan Parlament Májilisiniń birinshi sessııasynyń ashylýynda sóılegen sózin biz qoldaımyz. Ásirese «Aq jol» fraksııasy týraly aıtqan sózderi óte oryndy. Shyn máninde, «Aq jol» partııasynyń shaǵyn jáne orta bıznes pen otandyq óndirýshilerdi qorǵaýǵa arnalǵan usynystary jetkilikti.
Prezıdent ádil, turaqty ári ashyq salyq júıesin qalyptastyrý kerektigin taǵy da sóz etti. Bul tapsyrmalardy «Aq jol» partııasy qabyldady. 2012 jyldan bastap biz Úkimetke saralanǵan salyq mólsherlemesin engizýdi tabandy túrde usynyp kelemiz. Dál osyndaı talap «Aq jol» demokratııalyq partııasynyń baǵdarlamasynda da bar. Biz 12 jyldan beri ár salanyń ereksheligin eskeretin salyq mólsherlemelerin engizýdi talap etip keldik. Qazir elde sút óndirýshiler, qurylysshylar, bólshek saýda jelileri jáne iri taýar alpaýyttary birdeı qosymsha qun salyǵyn jáne korporatıvtik tabys salyǵy mólsherlemelerin tóleıdi. Biraq memleket munaı, gaz jáne metall eksporttaýshylaryna QQS-ti qaıtarady, al barlyq otbasy qaryz bolyp otyrǵan bankter bul salyqty múldem tólemeıdi. Iаǵnı baılar az, al áreń kúneltip júrgender – ózderi úshin jáne baılar úshin tóleıdi.
Prezıdent Q.Toqaev 2022 jylǵy 1 qyrkúıektegi Joldaýynda jańa Salyq kodeksin ázirleý jáne saralanǵan mólsherlemelerdi engizý týraly tikeleı tapsyrma berdi. Osylaısha, Prezıdenttiń bul tapsyrmasy on jylǵa sozylǵan daýǵa núkte qoıdy, muny parasattylyq pen Parlamenttegi fraksııamyzdyń kúsh-jigeriniń jeńisi dep baǵalaýǵa bolady. Biz bul jumysty naqty iske asqanynsha jalǵastyramyz.
Memleket basshysy Úkimetti jeńiske jetken partııa jasaqtaıdy, jaýapkershilik te sol partııaǵa júkteledi dep atap ótti. «Aq jol» dempartııasy Úkimetti saılaýda jeńiske jetken partııa jasaqtaýy kerektiginin birneshe ret usynyp kelemiz. Bul bılik tarmaqtaryn bólý fýnksııasy, tejemelik pen tepe-teńdik balansy, munda Parlament pen máslıhattar túrindegi ókildi organdar mańyzdy ról atqarýǵa tıis. Úkimetti saılaýda jeńiske jetken partııa jasaqtaýy kerek. Sonda bul partııa óz Úkimetiniń jetistikteri men kemshilikterine de jaýapty bolady.
Sondaı-aq Qasym-Jomart Toqaev Úkimettegi jáne aımaqtardaǵy basshylyq qyzmetterge túrli partııa ókilderin tartqan jón dedi. Osy oraıda «Aq jol» Konstıtýsııalyq reformany odan ári damytý jáne tereńdetý týraly Usynys paketin daıyndady. Negizi Memleket basshysynyń: «Bolashaqta tek kópshilik daýysqa ıe bolǵan saıası kúshterdiń ǵana emes, basqa da parlamenttik partııalardyń ókilderi Úkimetke kele alady» degen bastamasynyń mańyzy zor. «Aq jol» fraksııasy bolsa dál osyndaı usynysty 2012 jyly «Parlamenttik oppozısııa týraly» zań aıasynda usynǵan bolatyn. Atalǵan zań Prezıdenttiń tikeleı nusqaýymen segiz jyldan keıin ǵana qabyldanyp, tipti sol kezde de Úkimet bul normany ótkizbeı qoıǵan bolatyn. Biraq demokratııalyq qoǵamda kez kelgen bılik partııasy erte me, kesh pe bılikti beredi. Bul – aksıoma, bul – shyndyq.
Sondyqtan oppozısııada Úkimette praktıkalyq jumys tájirıbesi bar daıyn kadrlar bolýy kerek. Parlamenttegi depýtat sany az azshylyq partııalaryna ózderiniń kadrlyq rezervin daıyndaýǵa jáne osy maqsatta Úkimetke óz ókilderin jiberýge múmkindik berý kerek.
«Aq joldyń» negizgi baǵyty qazirgi kezde Prezıdent Toqaevtyń reformalarymen úılesim taýyp otyr. Iаǵnı shaǵyn jáne orta bıznesti qoldaý. Sonyń ishinde nazarymyz – orta bızneste. О́ıtkeni shaǵyn bıznes kóbinese saýda men qyzmet salasyn qamtıdy. Al óndiris salasy, ıaǵnı otandyq óndirýshiler olar orta bıznesten bastaıdy. Shaǵyn jáne orta bıznesti qoldaý bul bir tarmaq bolsa, orta bıznesti, ıaǵnı otandyq óndirýshilerimizdi qoldaý onyń ishki tarmaǵy bolmaq.
Sonymen birge monopolııasyzdandyrý baǵytyna da qazirgi kezde asa erekshe nazar aýdaramyz. Májilistegi ózimizdiń jumysymyzdy osy baǵytqa arnaımyz.
Azat PERÝAShEV,
«Aq jol» demokratııalyq partııasynyń tóraǵasy