Tennısten AQSh-tyń Maıamı qalasynda uıymdastyrylǵan WTA 1000 týrnıri óz máresine jetti. Keıingi eki aptanyń ishinde eń mańyzdy eki jarystyń fınaldyq kezeńinde baq synaǵan Qazaqstannyń birinshi, álemniń jetinshi raketkasy Elena Rybakına, ókinishke qaraı, Maıamıdegi dodada jeńis tuǵyryna kóterile almady. Bas júlde úshin ótken básekede jerlesimiz «Úlken dýlyǵa» týrnıri – Ýımbldonnyń eki dúrkin jeńimpazy (2011, 2014) chehııalyq Petra Kvıtovamen sheberlik baıqasyp, eki setke jalǵasqan matchta qarsylasyna jol berdi.
Jalpy, Elena Rybakına úshin bıylǵy tennıs maýsymy óte sátti ótip jatyr dep aıta alamyz. Otandasymyz keıingi úsh aıda osymen úshinshi márte halyqaralyq týrnırlerdiń fınaldyq kezeńinde baq synady. Qańtar aıynda «Úlken dýlyǵa» sanatyndaǵy eń mańyzdy tórt jarystyń alǵashqysy – Aýstralııa ashyq chempıonatynyń fınalynda oınasa, naýryz aıynda Indıan-Ýellstegi «BNP Paribas Open» (WTA 1000) týrnırinde top jardy. Bir qyzyǵy, Rybakına «Jasyl qurlyqtaǵy» týrnırdiń fınalynda Belarýs maqtanyshy, álemniń ekinshi raketkasy Arına Sobolenkoǵa ese jibergen bolsa, Indıan-Ýellstegi fınalda dál sol Arınadan ese qaıtarǵan bolatyn. Endi, mine, Qazaqstan tennısshisi bıylǵy maýsymdaǵy úshinshi fınalynda óner kórsetti.
О́kinishke qaraı, otandasymyzǵa AQSh-ta qatarynan eki týrnırde jeńis tuǵyrynan kóringen álemdegi tórt tennısshiniń qataryna qosylý baqyty buıyrmady. Atap aıtar bolsaq, búginge deıin Indıan-Ýells pen Maıamıdegi týrnırde germanııalyq Shteffı Graf (1994, 1996), belgııalyq Kım Klıısters (2005), Belarýs ókili Vıktorııa Azarenko (2016) jáne polshalyq Iga Shvıontek (2022) top jarǵan.
Maıamıdegi týrnırde kil myqty tennısshilerdi jarys jolynan yǵystyrǵan Elena Rybakına fınalda álemniń 12-raketkasy, joǵaryda aıtyp ótkenimizdeı Ýımbldonnyń eki dúrkin jeńimpazy, 2019 jylǵy Aýstralııa ashyq birinshiliginiń fınalısi Petra Kvıtovadan aılasyn asyra almady.
Ýımbldon týrnıriniń eki jeńimpazy arasynda ótken fınaldyq básekeniń birinshi partııasy bir saǵattan asa ýaqytqa sozylyp, eki tennısshi de jeńis úshin aıanyp qalǵan joq. Dopty oıynǵa qosý sátinde qarsylastar asa saq oınap, qatelik jasamaýǵa tyrysty. Toǵyzynshy geımge kelgende birinshi bolyp Rybakına qatelik jasap, dopty ózi oıynǵa qosqan geımde qarsylasyna breık jasaýǵa múmkindik berip qoıdy – 4:5. Biraq kelesi geımde Elenanyń ózi de qaıyra breık jasap, tarazy basyn teńestirip úlgerdi – 5:5. Keıingi eki geımde eki tennısshi de saýatty oıynymen kózge túsip, bir-birin alǵa jibergen joq – 6:6. Sóıtip, birinshi partııanyń jeńimpazy taı-breıkte anyqtaldy. Bul kezeńde psıhologııalyq turǵyda senimdi kóringen chehııalyq tennısshiniń baǵy jandy – 7:6 (16:14).
Birinshi sette qarsylasyna jol berip qoıǵan soń otandasymyz ekinshi kezeńde eńse tiktep úlgere almady. Bul partııada alǵashqy geımdi óz paıdasyna jazǵan Kvıtova ekinshi geımde breık jasady. Keıin ózi dopty oıynǵa qosqan úshinshi geımde de qatelesken joq – 3:0. Sóıtip, segizinshi geımge kelgende Petra taǵy bir breık jasap, setti de, matchty da óz paıdasyna aıaqtady – 6:2. Osylaısha, 33 jastaǵy Kvıtova óziniń sporttyq ǵumyryndaǵy 30-shy jeńisine qol jetkizdi. Aıta keteıik, qarsylastar osyǵan deıin eki márte kezdesip, bir-birden jeńiske jetken edi. Bul jeńisten keıin Petra 2:1 esebimen alǵa shyǵyp aldy.
Elena Rybakına Maıamı WTA 1000 týrnıri barysynda 70-ke jýyq eıs jasap, tennıs tarıhynda rekord ornatty. Atap aıtqanda, Rybakına reseılik Anna Kalınskaıamen oıynda – 14, ıspanııalyq Paýla Badosamen básekede – 12, belgııalyq Elıza Mertens jáne ıtalııalyq Martına Trevızanmen ótken kezdesýde 10-10-nan eıs jasasa, amerıkalyq Djessıka Pegýlamen matchta – 11 jáne Petra Kvıtovamen fınalda – 12, barlyǵy 69 eıske qol jetkizdi.
Maıamı WTA 1000 týrnırinde ekinshi orynǵa ıe bolǵan jerlesimiz 662,3 myń AQSh dollary (301,2 mıllıon teńge) kóleminde syıaqyǵa ıe boldy. Al WTA 1000 sanatyndaǵy onynshy týrnırinde úzdik shyqqan Kvıtova 1,26 mıllıon dollarmen (574,08 mıllıon teńge) birge 1 000 reıtıngtik upaıǵa ıe boldy. Osy nátıjesiniń arqasynda ol búginnen bastap TOP-10 tennısshiniń qataryna qosylsa, Rybakına álemdik reıtıngtegi 7-ornyn saqtap qaldy.