Ortalyq Azııa men AQSh elderiniń memlekettik organdary, azamattyq qoǵam men jeke sektor ókilderi sıfrlyq saýda jáne kıberqaýipsizdik máselelerin talqylaý úshin Almatyǵa jınaldy.
Konferensııada Qazaqstan, Qyrǵyzstan, Tájikstan, Túrikmenstan, О́zbekstan elderiniń saýda, sıfrlyq damý jáne aqparattyq qaýipsizdik mınıstrlikteriniń ókilderi bıznes úshin kıberqaýipsizdik múmkindikterin talqylady. Bul bıznestegi básekelestiktiń artyqshylyqtarynyń biri retinde qarastyrylyp otyr.
AQSh ishki qaýipsizdik departamenti halyqaralyq kıber saıasat jónindegi dırektorynyń orynbasary Iаn Hansen, zańger keńesshi Krısten Baýer AQSh saýda mınıstrliginiń baǵdarlamasy týraly aıtty. «CLDP baǵdarlamasy 2021 jyldyń qarashasynda AQSh pen Ortalyq Azııanyń sıfrlyq saýda jónindegi jumys tobyn iske qosty. Bul baǵdarlama Ortalyq Azııa elderinde jáne álemniń basqa elderimen ári óńirlerimen saýda jáne ekonomıkalyq baılanystardy ilgeriletý úshin qurylǵan», dedi Krısten Baýer.
Jumys toby ozyq halyqaralyq tájirıbeni ilgeriletýmen, sıfrlyq saýda úshin kedergilerdi joıý, óńirde sıfrlyq saýdanyń damýy men órkendeýine múmkindik beretin qajetti normatıvtik-quqyqtyq bazany qurýmen aınalysady. Jumys toby elektrondy tólemder, qoltańbalar, tranzaksııalar salasyndaǵy normatıvtik-quqyqtyq reformalarmen, transshekaralyq derekter aǵyndarymen, aqparattyq qaýipsizdikpen, derekterdi qorǵaý jáne qupııalylyqpen, tutynýshylardy qorǵaý jáne sıfrlyq salyqtarmen aınalysady.
AQSh pen Ortalyq Azııanyń sıfrlyq saýda jónindegi jumys tobynyń múshesi, Almaty isker áıelder keńesiniń tóraǵasy Aqerkin Eralıeva óńirlik ıntegrasııa sheńberindegi aqparattyq qaýipsizdiktiń mańyzdylyǵyna toqtaldy. «Biz CLDP baǵdarlamasyn eki jyldan beri júrgizip kelemiz. Bıyl shaǵyn jáne orta kásipkerlik pen IT ókilderine arnalǵan «Cyber Readiness Institute» oqý baǵdarlamasyn iske qosamyz. Sonymen qatar CLDP baǵdarlamasy Kıberqaýipsizdik boıynsha óńirlik oqý semınaryn uıymdastyrdy», dedi Aqerkin Eralıeva.
Spıkerler senimdi jetkizý tizbegin qurý jáne sıfrlyq saýdanyń ulttyq/óńirlik maqsattaryn ilgeriletý joldaryn qarastyrdy. Satu.kz bas dırektory Maksım Melnık eldegi sıfrlyq saýdany jaı-japsaryn jetkizdi.
Al bólek sessııalar kıberqaýipsizdiktiń tıimdi ádisterin ázirleý jáne sıfrlyq saýdanyń ósýin qoldaý úshin qajetti quqyqtyq reformany engizýge arnaldy. Negizgi plenarlyq otyrysta kıberqaýipsizdiktiń negizderi men negizdemelik qaǵıdattaryna sholý jasalyp, bıznes, tutynýshylarmen, ınvestorlarmen senimdi nyǵaıtý máseleleri, sıfrlyq saýda men ınvestısııalardaǵy kedergiler, kıberqaýipsizdikti bıznes úshin básekelestik artyqshylyq retinde paıdalaný jáne jahandyq jetkizý tizbekterimen baılanysty máseleleri qaraldy.
– Aqparattyq júıeler múmkindikteriniń artýymen qatar kıberqaýipsizdik máseleleri de ózekti bolyp otyr. Biz kıberqaýipsizdik týraly habardarlyqty arttyrý máselelerin jáne onyń saýda men ınvestısııaǵa qalaı áser etetinin, strategııalyq mańyzdy júıeler men qupııa aqparatty kıberqaýipterden qalaı qorǵaýǵa bolatynyn talqyladyq. Aqparattyq qaýipsizdikti kúsheıtý arqyly sıfrlyq tehnologııalardy paıdalanýdyń jańa deńgeıine ótýge bolady, – dedi Aqerkin Eralıeva.
Konferensııa sońynda CLDP baǵdarlamasynyń ókilderi «cyber Champions» aımaqtyq jelisiniń iske qosylǵanyn jáne Ortalyq Azııa óńiri úshin «cyber Readiness» ınstıtýtynyń kıberqaýipsizdik boıynsha tegin oqý baǵdarlamasy iske qosylǵanyn habarlady. Sonymen qatar Almatyda kıber chempıondar qoǵamdastyǵynyń qurylǵany málim boldy.
ALMATY