Bakýde Ázerbaıjannyń tuńǵysh prezıdenti Geıdar Alıevtiń týǵanyna 100 jyl tolýyna oraı bokstan jastar arasyndaǵy halyqaralyq týrnır uıymdastyryldy.
Kaspıı teńiziniń jaǵalaýynda ótkizilgen baıraqty básekede Qazaqstannyń jastar quramasy tolyq quramda qatysyp, 11 medal jeńip aldy. Atap aıtqanda, Erjan Iztileýov (52 kg), Tagır Sataev (63 kg) jáne Jasulan Berdaly (70 kg) óz salmaqtarynda úzdik shyqsa, Igor Solovev (63 kg), Bekarys Nurmuhan (66 kg), Beksultan Qaıratuly (80 kg) fınalda jeńilip, kúmis medalǵa ıe boldy. Al Ramazan Orynbasar (50 kg), Asqar Qýanysh (63 kg), Muhıt Nurqabyl (57 kg), Baqytjan Aıtmuhanov (75) jáne Anııat Tileýjan (80 kg) halyqaralyq týrnırdiń qola júldegerleri atandy.
Jalpykomandalyq esepte 4 altyn, 3 kúmis, 3 qola medal oljalaǵan Reseı boksshylary top jarsa, Qazaqstan quramasy 11 júldemen ekinshi orynǵa ıe boldy. Al úzdik úshtikti Ázerbaıjan boksshylary (3+1+13) túıindedi. Sondaı-aq jarys qorytyndysy boıynsha Danııar Aqbısenov «Eń jigerli boksshy» atandy.