Bıylǵy qystyń qarasýyǵy Syr jurtshylyǵyn biraz qysyp, mal-jandy ábigerge salyp qoıdy. Degenmen naýryzdyń sońǵy kúnderi kún qabaǵy kúrt ashylyp, tal-daraqtar búrshik jara bastaǵan edi. Osy mamyrajaı mezetti sáýirdiń alǵashqy kúnderi kóterilgen shańdy daýyl buzdy da ketti.
Aýa raıynyń qolaısyzdyǵynan birqatar eldi mekender elektr jaryǵynan ajyratylyp, baǵanalar men kóshe boıyndaǵy aǵashtar opyrylyp tústi. О́ńirlik kommýnıkasııalar qyzmetinde ótken brıfıngte sala mamandary eki kún ishindegi jaǵdaıdan tolyq maǵlumat berdi.
– Sekýndyna 15-28 metr jyldamdyqpen soqqan daýyl saldarynan oblys, aýdan jáne birqatar aýyldar ishinara elektr jaryǵynan ajyratyldy. «KREK» AQ mamandarynan aqaý elektr jelilerin qalpyna keltirý úshin barlyq aýdanǵa 260 adamnan turatyn 64 brıgada jasaqtaldy, 54 tehnıka jumys istedi, – dedi oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Qaısar Maqsutuly.
Dúleı daýyl «Qazaly-Temirjoljylý» fılıalyna qarasty bý qazandyǵynyń 40 metrlik murjasyn qulatyp, apattyq jaǵdaı oryn aldy. Áıteýir, adam aman, qazandyq ǵımaratyna da zaqym kelmegen. Avarııalyq jaǵdaıdy qalypqa keltirý úshin 2 kran, 1 jyljymaly dánekerleý agregaty, fılıaldyń 15 mamanynan quralǵan top jumys jasady. «Qyzylordajylýelektrortalyǵy» memlekettik kommýnaldyq kásipornynyń dırektory Medet Ýsaınnyń aıtýynsha, búginde murjanyń jaramdy bóligi qaıta ornatylyp, № 2,4 qazandyqtar iske qosylyp, jylý berilýde.
– Osy jyldyń 1-2 sáýirinde oblys aýmaǵynda qalyptasqan meteorologııalyq qubylys saldarynan 24 nysanǵa zaqym keldi. Shatyry ushqan 22 nysannyń barlyǵy derlik jartylaı nemese ishinara zaqymdanǵan. Qazir qala jáne aýdandarda keltirilgen shyǵyn kólemi eseptelip jatyr, – deıdi oblys ákimi apparaty tótenshe jaǵdaılardyń aldyn alý jáne joıý bóliminiń basshysy Aǵaısha Smatova.
Shatyrsyz qalǵan ǵımarattar qatarynda 6 mektep, 1 kolledj, 3 aýyldyq mádenıet úıi, 9 memlekettik mekeme, 2 kópqabatty turǵyn úı, 3 jeke baspana bar.
Brıfıngte «Qazgıdromet» RMK Qyzylorda oblysy boıynsha fılıalynyń bólim basshysy Áıgerim Jókelova aldaǵy kúnderi jel ekpini tómendep, aýa temperatýrasy túnde 7+12, kúndiz 15+23 gradýsqa deıin kóteriletinin aıtty.
QYZYLORDA