Almaty qalalyq máslıhatynyń kezekten tys sessııasynda qala aýmaǵynda jańa ákimshilik-terrıtorııalyq aýdan qurý týraly sheshim qabyldandy.
Qala ákimi Ahmetjan Esimov bul sheshim qala aýmaǵy taǵy da 23 200 gektarǵa keńeıtilgennen keıin qabyldanǵan qajettilik ekendigin aıta kelip, sonymen qatar, qala halqynyń sany kóbeıip, 1 mıllıon 665 myń adamǵa jetkenin, sol sebepti Elbasy Nursultan Nazarbaevqa Almaty aýmaǵynda jańa aýdan qurý týraly usynys joldanyp jáne ol usynystyń qabyldanǵanyn jetkizdi.
Naýryzbaı aýdany dep atalatyn jańa aýdannyń jer kólemi 6 976 gektar bolsa, halyq sany ázirge 157 myń adam. Qalalyq máslıhattyń sheshimimen buryn qalalyq jer qatynastary basqarmasynyń basshysy bolǵan Qýanysh Qashqynbaev ákim bolyp saılandy. Sondaı-aq, qala bıýdjetinen jańa aýdannyń qurylys jumystary men joldaryn jónge keltirý úshin 3,3 mıllıard teńge bólindi.
Qanat ESKENDIR,
«Egemen Qazaqstan».
ALMATY.