Almatyda ónerdiń ár baǵytynan óris tapqan shyǵarmashyl jastar az emes. Olardyń izin basqan baldyrǵan býyn ishinde, ásirese beıneleý ónerine den qoıǵan talantty balalardy aıryqsha atar edik. Myńboıaýdan tylsym izdegen kishkentaı sheberlerge ózara tájirıbe almasatyn rýhanı orta qajet. Mıllıondar toǵysqan megapolıstegi mádenıetimizdiń basty oshaǵy Memlekettik Ortalyq mýzeı óner súıgen órenderge osyndaı múmkindik syılady.
Jazıra dalany myńsan boıaýǵa shomyldyrǵan ásem gúlder, dúnıege jan bitirgen shuǵylaly kóktem, syldyrap aqqan taý ózeni, býyrqanǵan asaý teńiz úlken armanǵa qol sozǵan kishkentaı sýretshilerdiń kenebinde tipten qulpyra túsken. «Shyǵarmashyl alań» dep atalǵan kórmege qatysqan ár jetkinshektiń ómirdi óz ishki álemindeı taza qalpynda qabyldaýy, armany, ónerge qushtarlyǵy boıǵa shabyt beredi. Kórmege Almaty qalasynyń 100-den astam balalar shyǵarmashylyǵyn damytý jáne beıneleý óner ortalyǵynyń oqýshylary qatysyp, beıneleý jáne sándik-qoldanbaly óner janryndaǵy ártúrli jumystaryn usyndy.
Memlekettik Ortalyq mýzeı dırektory Rashıda Harıpova balalar shyǵarmashylyǵyn qoldaý mýzeı jumysynyń mańyzdy baǵyttarynyń biri ekenin aıtady. О́ıtkeni keleshek urpaqty ónerge baýlý, rýhanı qýaty myqty kóshke aınaldyrý – jaýapty mindet. Atalǵan is-shara mádenıet oshaǵynyń bul baǵyttaǵy jańashyl bastamalarynyń biri. Balǵyn ónerpazdardy yntalandyrýǵa arnalǵan jobalar dástúrli túrde jalǵasyn tappaq.
«Balalardyń kórmege qatysýy olarǵa elimizdiń tarıhy, óneri, mádenıetimen tanysýǵa, týǵan jeriniń ulttyq qundylyqtary, dástúrleri men sulýlyǵy týraly túsinikterin keńeıtýge múmkindik beredi. Bul Otanǵa, óz halqyna degen súıispenshilikterin oıatady. Sondyqtan jas sýretshiler óz jumystarynda qorshaǵan álemge, eldiń ótkeni, búgini men bolashaǵy týraly óz kózqarastaryn bildirýge tyrysty. Balalar Qazaqstannyń tarıhy, mádenıeti, tabıǵatymen baılanysty túrli aspekti men sıýjetti beıneleıdi. Bul kórkem peızajdar, adamdardyń portretteri jáne natıýrmorttar, qalanyń kósheleri men kórikti jerleri, táýelsiz memleketimizdiń rámizderi balalardyń armandaryn qanattandyra túsken», deıdi mýzeı dırektorynyń orynbasary Serjan Sarov.
Baldyrǵan sýretshilerdi bir alańda toǵystyrǵan óner jármeńkesinde «Da Vınchı», «Vý ArT», «ArtMıks», «Bilim stýdııasy», «Klass», «DARıIа» balalar shyǵarmashylyǵy ortalyqtarynyń shákirtteri erekshe kózge tústi. Olardyń arasynda respýblıkalyq, halyqaralyq baıqaýlarda júlde alǵan talantty sýretshiler bar. Sonymen birge kórmeniń ashylýynda óner kórsetken «Sem chýdes sveta» balalar teatry, «Aı-Kerbez» bı toby men «Fıesta» bı ansambli kópshiliktiń yqylasyna bólendi.
Jas sýretshilerdiń ıdeıalary men shyǵarmashylyq nıetterin kórsetetin kórkemóner mektepteri men beıneleý stýdııalary oqýshylarynyń avtorlyq jumystaryna elimizdiń baıandy bolashaǵyn, jarqyn tabystaryn tanytatyn taqyryptar arqaý bolǵan. О́nertanýshy Elena Isakova: «Balalardyń jumystary óte kórkem, ashyq, ereksheligi men ár alýan bolǵandyǵy sondaı, olardyń qorshaǵan álemge degen qýanyshty kózqarasy men qııal kókjıegi tańǵaldyrdy», dep oı bólisti.
ALMATY