Keıingi jyldary elimizdiń shahmatshy qyzdary halyqaralyq týrnırlerde júldeli oryndardan jıi kórinip, elimizdiń jankúıerlerin jarqyn jeńisterimen qýantyp júr. Sonyń bir aıǵaǵy – blıs shahmattan eki dúrkin álem chempıony, halyqaralyq dárejedegi grossmeıster Bıbisara Asaýbaeva kúni keshe Úndistannyń bas shahary – Nıý-Delıde uıymdastyrylǵan shahmattan áıelder arasyndaǵy Gran-prı jarysynda ekinshi orynǵa ıe boldy.
Sońǵy sheshýshi kezeńniń básekelerine deıin týrnır kestesinde kósh bastap kelgen otandasymyz 11-týrda reseılik shahmatshy Katerına Lagnomen sheberlik baıqasyp, asa tartysty ótken kezdesý teń aıaqtaldy. Sonymen qatar týrnır boıy otandasymyzdy ókshelep kelgen qytaılyq Chjý Szıner men reseılik Aleksandra Gorıachkına sońǵy týrda bir-birimen oınap, bul básekelerde de jeńimpaz anyqtalmady. Sóıtip, jarys qorytyndysy boıynsha úsh shahmatshy da birdeı 6 upaı jınady. Biraq jeke kórsetkishteri boıynsha reseılik Aleksandra Gorıachkınanyń baǵy janyp, áıelder arasyndaǵy Gran-prı jarysynyń jeńimpazy atandy. Al Bıbisara Asaýbaeva – kúmis, Chjý Szıner qola júldege ıe boldy. Degenmen Halyqaralyq shahmat federasııasy týrnır kestesinde birdeı upaı jınaǵan 3 shahmatshyǵa da 12 333 eýro kólemindegi syıaqy men 133 reıtıngtik upaı berdi.
Endi áıelder arasyndaǵy FIDE Gran-prıiniń sheshýshi, tórtinshi kezeńi Kıprdiń Nıkosııa qalasynda 15-28 mamyr aralyǵynda ótedi. Sheshýshi kezeńge nebári 12 shahmatshy shaqyrtý aldy. Olar: Bıbisara Asaýbaeva (Qazaqstan), Alına Kashlınskaıa, Polına Shývalova, Aleksandra Kostenıýk, Aleksandra Gorıachkına, Dınara Vagner, Katerına Lagno (barlyǵy – Reseı), Anna Mýzychýk, Marııa Mýzychýk (ekeýi de – Ýkraına), Harıka Dronavallı (Úndistan), Nana Dzagnıdze (Grýzııa) jáne Tan Chjýngı (Qytaı).