Endi kez kelgen azamat el aýmaǵyndaǵy bos jer telimderi týraly aqparatqa erkin qol jetkize alady. Bul – jer qatynastary týraly zańǵa engizilgen ózgeristen keıin múmkin bolyp otyr.
Memleket basshysy Qasym-Jomart Toqaev «Qazaqstan Respýblıkasynyń keıbir zańnamalyq aktilerine jer qatynastary salasyndaǵy memlekettik kórsetiletin qyzmetterdi sıfrlandyrý máseleleri boıynsha ózgerister men tolyqtyrýlar engizý týraly» zańǵa qol qoıdy. Qujattaǵy tolyqtyrýlar týraly Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın taratyp aıtyp berdi.
– Bizdiń mınıstrlik jer ýchaskelerin berýdiń eskirgen erejelerin tolyǵymen ózgertýdi jáne ony elektrondy formatqa kóshirýdi talap etetin zań jobasyn ázirleýge belsendi qatysty, sonymen qatar bul úderistiń tıimdiligin dáleldeý qajet boldy. Meniń oıymsha, biz barlyǵyn oıdaǵydaı iske asyra aldyq. Parlamenttegi áriptesterime alǵys aıtqym keledi, óıtkeni Májilis pen Senattaǵy jalpy otyrystarda kóptegen suraq kóterilip, bul zań jobasynyń mańyzdylyǵy atap ótildi, – dedi Sıfrlyq damý, ınnovasııalar jáne aeroǵarysh ónerkásibi mınıstri.
Zańǵa sáıkes jaýapty vedomstvo Prezıdent tapsyrmasynan keıin jer telimine qatysty quqyqtardy tirkeý rásimderin jeńildetetin «Biryńǵaı memlekettik jyljymaıtyn múlik kadastry» júıesin ázirledi. Oǵan qol jetkizý qoǵamdyq kadastr kartasy arqyly júzege asyrylady. Al kadastr kartasy jyljymaıtyn múlik pen jerdi satyp alý, satý, ashyq túrde jalǵa berý syndy belgili bir mámilelerdi júzege asyrý úshin memlekettik kadastr júıesinen onlaın málimetter alýǵa múmkindik beredi.
– Joba kezeń-kezeńmen keńeıtildi. Bıyldan bastap, jer telimin berý jónindegi elektrondy formatqa 89 qalanyń jeri týraly derekter kóshiriledi. Qazir Indýstrııa jáne ınfraqurylymdyq damý mınıstrligimen jáne jergilikti atqarýshy organdarmen birlese otyryp, atalǵan jobany tolyqqandy iske qosý jumystary júrgizilip jatyr, – dep naqtylady B.Mýsın.